Lárionad Comhordúcháin Práinnfhreagartha (ERCC)

Is é an Lárionad Comhordúcháin Práinnfhreagartha (ERCC) croílár Shásra an Aontais um Chosaint Shibhialta. Déanann sé faireachán ar imeachtaí ar fud an domhain agus cinntíonn sé go gcuirtear tacaíocht éigeandála ar fáil go tapa tar éis tubaistí móra, lena n-áirítear iad siúd atá níos measa mar gheall ar an athrú aeráide, amhail triomach, falscaithe, etc. Comhordaíonn ERCC seachadadh cúnaimh do thíortha atá buailte ag tubaistí, amhail earraí fóirithinte, saineolas, foirne cosanta sibhialta agus trealamh speisialaithe.

Cinntíonn an lárionad go gcuirtear tacaíocht éigeandála ar fáil go tapa agus gníomhaíonn sé mar mhol comhordúcháin idir Ballstáit uile an Aontais, na 7 stát rannpháirteacha breise, an tír atá buailte, agus saineolaithe cosanta sibhialta agus daonnúla. Oibríonn ERCC 24/7 agus is féidir leis cabhrú le haon tír laistigh nó lasmuigh den Aontas atá thíos le mórthubaiste arna iarraidh sin do na húdaráis náisiúnta nó do chomhlacht de chuid na Náisiún Aontaithe. 

Ina theannta sin, bainistíonn ERCC cúlchiste cúnaimh réamhgheallta ó Bhallstáit an Aontais agus ó stáit rannpháirteacha ar féidir é a imscaradh láithreach. Féadfaidh na tíortha sin acmhainní a ghealladh ar fuireachas i gcomhthiomsú, a bheidh réidh le húsáid mar chuid de fhreagairt Eorpach níos tapúla agus níos comhleanúnaí nuair is gá. Áirithítear cáilíocht na freagartha trí chritéir cháilíochta agus próiseas deimhniúcháin a bhunú.