Bileog Eolais 2021 maidir leis an Athrú Aeráide i Muir Bhailt

Arna fhorbairt go comhpháirteach ag Baltic Earth agus HELCOM, soláthraíonn an foilseachán seo achoimre do lucht déanta beartas ar an eolas eolaíoch is déanaí ar an gcaoi a bhfuil athrú aeráide ag dul i bhfeidhm ar Mhuir Bhailt faoi láthair agus ar an gcaoi a bhfuiltear ag súil go bhforbróidh sé sna blianta beaga amach romhainn. Tá sé i gceist leis an mbileog eolais cabhrú le lucht déanta beartas breithnithe maidir leis an athrú aeráide a chur san áireamh ina gcuid oibre agus ina gcinntí. Ar bhonn níos leithne, féachann sé freisin leis an bpobal a chur ar an eolas faoi éifeachtaí an athraithe aeráide i Muir Bhailt.

Tugtar tuairisc ar thionchair reatha agus ionchasacha an athraithe aeráide i Muir Bhailt trí 34 pharaiméadar arna ngrúpáil i bparaiméadair fhisiceimiceacha a ndéanann an t-athrú aeráide difear díreach dóibh (dá ngairtear paraiméadair dhíreacha), chomh maith le paraiméadair úsáide éiceachórais agus daonna a ndéantar difear indíreach dóibh (paraiméadair indíreacha).

Sa chéad chuid den tuarascáil seo tugtar faisnéis achomair ar thionchair an athraithe aeráide ar gach paraiméadar chomh maith le léarscáil tionchair ina léirítear na hathruithe réigiúnacha réamh-mheasta le haghaidh sraith roghnaithe paraiméadar faoi chás aeráide RCP4.5 ar fud Mhuir Bhailt. Tugann an dara cuid den tuarascáil forbhreathnú níos mionsonraithe, ach gonta, ar thionchair an athraithe aeráide ar gach paraiméadar — a ndéantar cur síos orthu mar phríomhtheachtaireachtaí. Cuirtear bearnaí eolais agus ábharthacht beartais (i dtéarmaí maolaithe agus oiriúnaithe) i dtábhacht sna príomhtheachtaireachtaí freisin.