Tuarascáil UNICEF maidir leis an tionchar a bhíonn ag tonnta teasa ar leanaí

Tá an ghéarchéim aeráide ag luasghéarú go tapa agus leis sin, tá tonnta teasa ag éirí níos faide, níos láidre, níos forleithne agus níos minice. Déanann teas dochar do shláinte leanaí go háirithe agus bíonn tionchar aige ar a n-oideachas agus ar a slite beatha amach anseo. Soláthraíonn an tuarascáil seo níos mó fianaise fós go bhfuil leanaí ar línte tosaigh na géarchéime aeráide.

Cheana féin, tá thart ar 559 milliún leanbh nochtaithe do mhinicíocht ard toinne teasa agus tá thart ar 624 milliún leanbh nochtaithe do cheann de thrí bheart teasa arda eile — fad ard toinne teasa, déine ard toinne teasa nó teochtaí an-ard. Faoi 2050, tuartar go mbeidh ar bheagnach gach leanbh ar domhan — os cionn 2 bhilliún leanbh — aghaidh a thabhairt ar thonnta teasa níos minice. Beidh ar leanaí i réigiúin an tuaiscirt aghaidh a thabhairt ar na méaduithe is suntasaí ar dhéine ard toinne teasa agus faoi 2050, beidh beagnach leath de na leanaí san Afraic agus san Áise neamhchosanta go leanúnach ar theochtaí arda foircneacha. Tá athrú ag teacht ar thonnta
teasa i mbeagnach gach tír. 

Leagtar béim sna torthaí sin ar an ngéarghá atá leis na seirbhísí a mbíonn leanaí ag brath orthu a chur in oiriúint de réir mar a thagann tionchair dhosheachanta an téimh dhomhanda chun cinn. Ní mór do
thíortha gníomhú anois trí leanaí a chosaint, a ullmhú agus tosaíocht a thabhairt dóibh agus trí thubaiste aeráide a chosc.