H2020

Orizzont 2020huwa l-istrument finanzjarju li jimplimenta l-Unjoni tal-Innovazzjoni, inizjattiva ewlenija tal-Ewropa 2020 li għandha l-għan li tiżgura l-kompetittività globali tal-Ewropa. Orizzont 2020 jirrifletti l-prijoritajiet ta' politika tal-istrateġija Ewropa 2020 u jindirizza t-tħassib ewlieni kondiviż miċ-ċittadini fl-Ewropa u bnadi oħra, permezz ta' approċċ ibbażat fuq l-isfidi.

Orizzont 2020 huwa l-akbar programm ta’ Riċerka u Innovazzjoni tal-UE li qatt sar bi kważi EUR 80 biljun ta’ finanzjament disponibbli fuq 7 snin (2014 sa 2020) – minbarra l-investiment privat li dawn il-flus se jattiraw. Sib informazzjoni dwar il-finanzjament ta’ H2020 u l-opportunitajiet ta’ offerti hawnhekk.

Huwa mistenni li madwar 35 % tal-baġit ta’ Orizzont 2020 se jkun nefqa relatata mal-klima. L-adattament għat-tibdil fil-klima huwa indirizzat l-aktar ta’ spiss fl-isfida tas-soċjetà dwar l-azzjoni klimatika, l-ambjent, l-effiċjenza fir-riżorsi u l-materja prima.

L-azzjonijiet klimatiċi taħt il-programm ta’ ħidma għall-2018-2020 għandhom l-għan li jipproduċu soluzzjonijiet għall-kisba tal-għanijiet ta’ mitigazzjoni u adattament tal-Ftehim ta’ Pariġi, u għal aktar għarfien xjentifiku rilevanti għall-implimentazzjoni tal-Kontributi Stabbiliti fil-Livell Nazzjonali (NDCs). L-azzjonijiet jappoġġaw ukoll il-politiki u l-objettivi rilevanti tal-UE, bħall-Unjoni tal-Enerġija, il-politika dwar l-Artiku, l-Istrateġija ta’ Adattament tal-UE u l-isforzi tad-diplomazija tal-UE dwar il-klima. Se tingħata kunsiderazzjoni speċjali lill-kooperazzjoni ma’ pajjiżi/reġjuni sħab strateġiċi. Għandhom isiru sforzi speċifiċi biex ir-riżultati tar-riċerka jiġu kkomunikati lil udjenza usa’, inkluż lill-pubbliku ġenerali.

Għall-adattament, dawn li ġejjin huma l-oqsma ta’ prijorità ġenerali:

• Valutazzjonijiet tar-riskju klimatiku u mmudellar
• L-ekonomija tat-tibdil fil-klima
• Servizzi tal-klima
• Soluzzjonijiet ibbażati fuq in-natura għall-adattament għat-tibdil fil-klima
• Reżiljenza għar-riskju ta' diżastri

L-objettivi rilevanti għall-adattament jinsabu wkoll fi sfidi globali oħra:

• Soċjetajiet siguri - Protezzjoni tal-libertà u s-sigurtà tal-Ewropa u ċ-ċittadini tagħha (prevenzjoni tar-riskju ta' diżastri relatati mal-klima)
• Saħħa, Tibdil Demografiku u Benesseri (determinanti ambjentali, mard infettiv)
• Is-Sigurtà tal-Ikel, l-Agrikoltura u l-Forestrija Sostenibbli, ir-Riċerka tal-Baħar, Marittima u tal-Ilmijiet Interni u l-Bijoekonomija (agrikoltura u forestrija sostenibbli)

Il-proposta tal-Kummissjoni Ewropea għall-programm il-ġdid Orizzont Ewropa għar-riċerka u l-innovazzjoni mill-2021 sal-2027 tkompli bil-prijorità li jiġi implimentat il-Ftehim ta’ Pariġi.