4. Il-valutazzjoni u l-għażla tal-għażliet ta’ adattament

Ladarba jkunu ġew identifikati l-għażliet potenzjali ta’ adattament u jkun inħoloq il-katalgu tal-għażliet ta’ adattament, il-passi li jmiss huma li jiġu vvalutati u prijoritizzati l-għażliet abbażi ta’ informazzjoni u kriterji dettaljati. B’hekk l-għażliet issuġġeriti jridu jiġu vvalutati biex tiġi ddeterminata l-adegwatezza tagħhom għall-kuntest lokali, l-effettività tagħhom fit-tnaqqis tal-vulnerabbiltà jew fit-tisħiħ tar-reżiljenza u l-impatt usa’ tagħhom fuq is-sostenibbiltà. L-objettiv huwa li jiġu evitati deċiżjonijiet li jwasslu għall-għażla ta’ azzjonijiet mhux xierqa jew għal adattament ħażin. L-għażla tal-għażliet ta’ adattament ippreferuti jenħtieġ li ssir f’interazzjoni mill-qrib mal-atturi kollha involuti u mal-partijiet ikkonċernati milquta fil-proċess ta’ adattament.

 Dan il-pass jgħin lill-bliet firmatarji tal-Patt tas-Sindki jiżviluppaw sistema ta’ valutazzjoni tal-għażliet ta’ adattament, jiġbru l-informazzjoni meħtieġa dwar dawn l-għażliet biex jippermettu l-valutazzjoni, inklużi l-ispejjeż u l-benefiċċji u fl-aħħar mill-aħħar jagħtu prijorità u jagħżlu l-għażliet ta’ adattament għall-implimentazzjoni tal-azzjonijiet.