Linji gwida informali għall-Maniġers tal-Proġetti: Nagħmlu l-investimenti vulnerabbli reżiljenti għat-tibdil fil-klima

L-objettiv primarju ta’ dawn il-Linji Gwida huwa li jgħinu lill-iżviluppaturi tal-assi fiżiċi u tal-infrastruttura jinkorporaw ir-reżiljenza għall-varjabbiltà klimatika attwali u għat-tibdil fil-klima futur fil-proġetti tagħhom. Dawn il-Linji Gwida jiffurmaw parti mill-isforz ġenerali tal-UE biex tintegra l-adattament għat-tibdil fil-klima, b’segwitu għall-White Paper dwar l-Adattament għat-Tibdil fil-Klima ppubblikata mill-Kummissjoni fl-2009. Dawn huma mfassla biex jipprovdu appoġġ lill-iżviluppaturi ta’ assi fiżiċi u infrastruttura. Huma għandhom l-għan li jgħinu lill-iżviluppaturi tal-proġetti jifhmu l-passi li jistgħu jieħdu biex jagħmlu l-proġetti ta’ investiment reżiljenti għall-varjabbiltà u t-tibdil fil-klima.

Il-Linji Gwida jipprovdu informazzjoni dwar il-passi li jistgħu jittieħdu biex tiġi integrata r-reżiljenza għall-klima fi ħdan evalwazzjoni familjari taċ-ċiklu tal-ħajja tal-proġett ipprattikata mill-iżviluppaturi tal-proġetti. Il-Kummissjoni tħeġġeġ bil-qawwa l-użu tal-Linji Gwida, kemm fi proġetti ffinanzjati mill-UE kif ukoll b’mod aktar wiesa’. Dawn jinsabu fil-kuntest tal-politika li qed jevolvi dwar l-adattament fil-Kummissjoni, li qed tara r-reżiljenza għat-tibdil fil-klima tiġi inkorporata f’għadd ta’ oqsma ta’ politika u strumenti ta’ finanzjament ta’ rilevanza għall-assi u l-infrastruttura. L-istituzzjonijiet tal-UE u dawk nazzjonali kif ukoll l-organizzazzjonijiet finanzjarji jistgħu jikkunsidraw jekk iridux jirrakkomandaw jew jirrikjedux l-użu tal-linji gwida għall-proġetti li jiffinanzjaw. L-Istati Membri individwali se jkollhom standards leġiżlattivi u regolatorji differenti li jirregolaw it-tfassil tal-proġetti.