Adattament u Tisqija f’Żoni Urbani Ekoloġiċi li jiffaċċjaw Mewġ tas-Sħana Klimatika, Nixfa u Stormi Estremi (LIFE AGUA DE PRATA)

Il-proġett LIFE AGUA DE PRATA għandu l-għan li jindirizza wħud mill-isfidi tal-iskarsezza tal-ilma li jiffaċċja r-reġjun ta’ Alentejo fil-Portugall billi jerġa’ juża b’mod sostenibbli l-ilma mill-bjar u n-nixxigħat ta’ Graça do Divor, li qabel kienu sorsi għall-akkwedott Ruman. L-użu ta’ dawn is-sorsi ta’ taħt l-art se jgħin biex tiġi ttrasformata l-provvista tal-ilma għat-tisqija u se jwassal għal iffrankar annwali ta’ madwar 120 000 m3 ta’ ilma tal-wiċċ ittrattat. B’hekk, it-theddida ta’ nuqqas ta’ ilma għal użi oħra se titnaqqas.

Il-proġett għandu wkoll l-għan li jadatta l-akkwedott sabiex iservi bħala sistema ta’ distribuzzjoni li kapaċi tipprovdi l-ħtiġijiet tal-ilma għal madwar 50 % taż-żoni ekoloġiċi tal-belt. Soluzzjonijiet ibbażati fuq in-natura u approċċi tal-ekosistema se jiġu applikati wkoll għal dawn iż-żoni biex tittejjeb il-kapaċità tagħhom li jifilħu għal mewġiet ta’ sħana u xita estrema. Barra minn hekk, il-proġett se jippromwovi miżuri għall-effiċjenza fl-użu tal-ilma u għall-iffrankar tal-enerġija, inkluża firxa ta’ miżuri għal ġonna żgħar. Il-proġett se jikkontribwixxi għall-istrateġija tal-muniċipalità għall-adattament għat-tibdil fil-klima, kif ukoll għall-Istrateġija tal-UE għall-Bijodiversità sal-2020 u għad-Direttiva dwar l-Għargħar.