Għajnuna għat-titjib tal-funzjonijiet tal-ħamrija u l-adattament għat-tibdil fil-klima permezz ta’ tekniki agrikoli ta’ konservazzjoni sostenibbli (LIFE HelpSoil)

L-intenzjoni tal-proġett hija li jittestja u juri soluzzjonijiet innovattivi u prattiki ta’ ġestjoni tal-ħamrija biex tittejjeb il-kwalità tal-ħamrija, u biex is-sistemi agrikoli jsiru aktar reżiljenti kontra t-tibdil fil-klima. Dan jgħin biex jiġi żgurat li l-għelejjel ikunu jistgħu jirreżistu l-istress ambjentali, inaqqas l-erożjoni u s-suxxettibbiltà tal-ħamrija għall-kompattazzjoni, itejjeb il-kapaċità tal-ħamrija li taġixxi bħala filtru u buffer kontra s-sustanzi niġġiesa, u jagħti spinta lill-bijodiversità tal-ħamrija. Għalhekk, ġestjoni aħjar tal-ħamrija tista’ tikkontribwixxi b’mod sinifikanti biex tiżdied ir-reżiljenza tal-ekosistemi terrestri fid-dawl tat-tibdil fil-klima.
Il-proġett se jkopri l-pjanura kollha tal-Po u l-għoljiet baxxi tal-Alpi u tal-Apennini fit-Tramuntana tal-Italja.
F’għadd ta’ azjendi agrikoli, se jiġu applikati prattiki ta’ konservazzjoni u tekniki innovattivi biex jittejbu l-funzjonijiet ekoloġiċi tal-ħamrija – is-sekwestru tal-karbonju organiku, il-fertilità tal-ħamrija u l-bijodiversità, il-protezzjoni kontra l-erożjoni –, tiżdied l-effiċjenza tal-irrigazzjoni, tittejjeb l-effiċjenza tal-fertilizzanti (b’mod partikolari d-demel tal-bhejjem) u jiġi limitat l-użu tal-pestiċidi.