L-adattament tal-infrastruttura għat-tibdil fil-klima

Jekk ma jiġix ġestit, it-tibdil fil-klima jista’ jaffettwa b’mod sinifikanti l-prestazzjoni operazzjonali, finanzjarja, ambjentali u soċjali ta’ assi fissi u infrastruttura kbar. Dan id-dokument jippreżenta l-kontribut tal-Unjoni Ewropea għall-adattament għat-tibdil fil-klima f’setturi tal-infrastruttura magħżula. Tkopri l-infrastruttura tal-enerġija u t-trasport kif ukoll il-bini fl-UE – setturi li ngħataw prijorità għall-integrazzjoni tal-politika tal-adattament fil-White Paper tal-2009 dwar l-Adattament għat-Tibdil fil-Klima.
Id-dokument jiddiskuti wkoll l-istrumenti u l-finanzjament ipprovduti mill-Unjoni Ewropea biex l-infrastruttura tal-Ewropa ssir aktar reżiljenti għall-klima. L-adattament tal-infrastruttura għat-tibdil fil-klima huwa negozju globali li qed jikber b’rata mgħaġġla li fih l-għarfien u l-esperjenza Ewropej jistgħu jiftħu opportunitajiet ekonomiċi ġodda. Billi tippromwovi l-investiment pubbliku u privat f’bini reżiljenti għat-tibdil fil-klima u f’infrastruttura tat-trasport u tal-enerġija intelliġenti, aġġornata u interkonnessa bis-sħiħ, l-azzjoni klimatika tal-UE tagħti kontribut importanti biex jinkisbu t-tkabbir u l-impjiegi fl-Ewropa. F'konformità ma' Ewropa 2020, hija tikkontribwixxi simultanjament għall-progress lejn trasport aktar sostenibbli u suq tal-enerġija sikur u nadif.