L-adattament għat-tibdil fil-klima u t-tnaqqis tar-riskju ta’ diżastri fl-Ewropa. It-tisħiħ tal-koerenza tal-bażi tal-għarfien, il-politiki u l-prattiki

Ir-rapport jivvaluta l-prattiki attwali u l-livell ta’ għarfien espert, u jenfasizza l-għodod innovattivi emerġenti li l-awtoritajiet nazzjonali, reġjonali u lokali qed jużaw biex jindirizzaw l-impatti tal-perikli relatati mat-temp u mal-klima.

Fil-livell globali, Ewropew u nazzjonali hemm ħtieġa emerġenti li tissaħħaħ il-koerenza bejn l-adattament għat-tibdil fil-klima (CCA) u t-tnaqqis tar-riskju ta’ diżastri (DRR) billi jitqiesu l-objettivi u d-differenzi simili tagħhom, u b’hekk jingħata kontribut għal tħejjija u rispons aħjar għad-diżastri, kif ukoll għall-iżvilupp sostenibbli. L-objettivi komuni huma relatati mal-ġestjoni tar-riskji klimatiċi (il-varjabbiltà u t-tibdil) u l-bini ta’ soċjetajiet reżiljenti għat-tibdil fil-klima. Abbażi ta' reviżjoni tal-prattiki attwali, ir-rapport jissuġġerixxi li, għalkemm jeżistu eżempji innovattivi, il-potenzjal sħiħ ta' integrazzjoni aħjar tad-DRR u s-CCA għad irid jiġi sfruttat.

Flimkien maż-żieda fil-frekwenza u/jew fl-intensità tal-perikli naturali relatati mat-temp u mal-klima, il-bidliet soċjoekonomiċi u l-esponiment għall-perikli qed jiżdiedu fil-ħsara u fit-telf ekonomiku. Għal din ir-raġuni, is-soċjetà Ewropea u dawk li jfasslu l-politika jridu jifhmu r-rwol tat-tibdil fil-klima fl-ixprunar ta’ temp estrem, kif ukoll l-interazzjonijiet u l-interdipendenzi ta’ temp estrem u avvenimenti klimatiċi ma’ fenomeni naturali u attivitajiet tal-bniedem oħra. Ir-rapport jiffoka fuq l-impatti tal-passat u dawk previsti, b’rieżami tas-sistemi eżistenti ta’ data dwar it-telf fl-Ewropa u bnadi oħra, u sommarju tal-ħidma żviluppata mill-OIEWG tan-NU dwar l-indikaturi tal-progress tal-Qafas ta’ Sendai għat-Tnaqqis tar-Riskju ta’ Diżastri (SFDRR).

Ir-rapport jikkunsidra sitt studji ta’ każijiet, rappreżentanti għall-koerenza bejn il-prattiki tas-CCA u tad-DRR. Il-messaġġi ewlenin huma dawn li ġejjin:

• Approċċ programmatiku, mibdi minn fuq għal isfel, eżegwit minn isfel għal fuq, u appoġġat minn finanzjament adegwat u strateġija fit-tul, jista’ jwassal għal integrazzjoni effettiva tas-CCA u tad-DRR.
• L-assiguraturi huma atturi ewlenin fis-CCA u d-DRR b’modi differenti.
• Il-kombinazzjoni tat-tfassil tal-aġenda nazzjonali u l-implimentazzjoni u l-integrazzjoni lokali tirriżulta f’eżekuzzjoni effettiva tal-istrateġiji tas-CCA u tad-DRR.
• Il-Valutazzjonijiet tar-Riskju Nazzjonali (NRAs) jistgħu jservu bħala bażi effettiva għas-CCA u d-DRR, peress li jipprovdu stampa usa’ tar-riskju u jagħtu indikazzjonijiet għal-limiti ta’ tolleranza.
• In-networks huma kruċjali fil-motivazzjoni tal-bliet u fl-appoġġ tal-bini tal-kapaċità għall-politika dwar it-tibdil fil-klima. Id-differenzi li jeżistu fil-kuntest istituzzjonali, kulturali u ekonomiku m’għandhomx jiġu injorati.