Approċċi bbażati fuq l-ekosistema għall-adattament u l-mitigazzjoni – eżempji ta’ prattika tajba u tagħlimiet meħuda fl-Ewropa

Dan ir-rapport jiddokumenta u janalizza eżempji ta’ prattika tajba ta’ approċċi bbażati fuq l-ekosistema għall-mitigazzjoni tat-tibdil fil-klima u l-adattament għalih fl-Ewropa. Approċċi bbażati fuq l-ekosistema għall-mitigazzjoni (EBM) huma definiti bħala l-użu ta’ ekosistemi għas-servizz tagħhom ta’ ħżin u sekwestru tal-karbonju biex jgħinu fil-mitigazzjoni tat-tibdil fil-klima. Approċċi bbażati fuq l-ekosistema għall-adattament (EBA) huma definiti bħala l-użu tal-bijodiversità u s-servizzi tal-ekosistema bħala parti minn strateġija ta’ adattament ġenerali biex tgħin lin-nies jadattaw għall-effetti negattivi tat-tibdil fil-klima; dawn l-approċċi jistgħu jinkludu l-ġestjoni sostenibbli, il-konservazzjoni u r-restawr tal-ekosistemi, bħala parti minn strateġija ta’ adattament ġenerali li tqis il-kobenefiċċji soċjali, ekonomiċi u kulturali multipli għall-komunitajiet lokali.

Dan l-istudju ġabar 101 studju tal-każijiet: 13 huma EBM, 49 huma EBA u 39 huma minn adattament fil-konservazzjoni tan-natura (disgħa minnhom intużaw biex jinfurmaw lill-EBA), li jkopru aktar minn 17-il pajjiż Ewropew (xi proġetti kienu reġjonali).

Ir-rieżami ta’ dawn il-proġetti kollha wera li l-approċċi bbażati fuq l-ekosistema għall-adattament u l-mitigazzjoni jġibu għadd ta’ benefiċċji ambjentali, soċjali u ekonomiċi minbarra l-adattament jew il-mitigazzjoni. Ħafna mill-approċċi tal-EBA jikkontribwixxu wkoll għall-EBM u viċi versa. Minkejja dawn il-benefiċċji, l-istudji wrew li hemm għadd ta’ ostakli għall-adozzjoni tal-approċċi tal-EBA u tal-EBM. It-tliet ostakli ewlenin huma: il-ħtieġa għal art konsiderevoli, oppożizzjoni mill-komunitajiet u nuqqas ta’ finanzjament.