Gwida dwar l-Integrazzjoni tat-Tibdil fil-Klima u l-Bijodiversità fil-Valutazzjoni tal-Impatt Ambjentali.

Il-ħtieġa għal azzjoni dwar it-tibdil fil-klima u t-telf tal-bijodiversità hija rikonoxxuta madwar l-Ewropa u madwar id-dinja. Biex isir progress lejn il-ġlieda kontra t-tibdil fil-klima u l-adattament għalih, u biex jitwaqqaf it-telf tal-bijodiversità u d-degradazzjoni tal-ekosistemi, huwa vitali li dawn il-kwistjonijiet jiġu integrati bis-sħiħ fil-pjanijiet, fil-programmi u fil-proġetti implimentati madwar l-UE. Il-Valutazzjoni Ambjentali tista’ tikkontribwixxi għal din l-integrazzjoni tat-tibdil fil-klima fi stadju bikri u b’hekk tnaqqas il-vulnerabbiltà u żżid ir-reżiljenza tas-sistemi naturali u umani. Ir-rapport jipprovdi linji gwida u rakkomandazzjonijiet biex it-tibdil fil-klima u l-bijodiversità jiġu integrati fil-Valutazzjoni tal-Impatt Ambjentali (VIA). Peress li t-tibdil fil-klima u t-telf tal-bijodiversità — bħal ħafna kwistjonijiet ambjentali oħra li qed niffaċċjaw — huma relatati mill-qrib, huma koperti fl-istess gwida.