Linji gwida dwar l-istrateġiji u l-pjanijiet ta’ adattament tal-Istati Membri

L-avvenimenti estremi reċenti – in-nirien fil-foresti, in-nixfiet, l-għargħar, u l-mewġiet ta’ sħana fatali – kemm madwar l-Ewropa kif ukoll madwar id-dinja, urew li l-konsegwenzi tat-tibdil fil-klima qed jolqtu lis-soċjetajiet tagħna b’mod aktar qawwi u aktar mgħaġġel milli pprojettat ix-xjenza. Iż-żieda fl-avvenimenti estremi tat-temp u d-diżastri naturali għandha impatt dejjem akbar fuq is-saħħa fiżika u mentali tan-nies, fuq il-bqija tan-natura u fuq l-assi ekonomiċi. Dawn il-linji gwida tal-KE huma għodda b’saħħitha għall-amministrazzjonijiet nazzjonali biex l-adattament għat-tibdil fil-klima jsir prijorità politika ewlenija.

F’konformità ma’ dawn id-dispożizzjonijiet, l-għan ta’ dawn il-linji gwida huwa:

• Biex l-Istati Membri tal-UE jiġu appoġġati fir-reviżjoni tal-istrateġiji ta’ adattament tagħhom u fl-abbozzar / fir-reviżjoni tal-pjanijiet ta’
  adattament tagħhom biex jissodisfaw l-isfidi relatati mal-adattament li jiffaċċjaw, filwaqt li jitqiesu d-differenzi fl-istrutturi amministrattivi
  tagħhom u l-perkorsi tal-ippjanar tal-adattament li diġà ħadu.
• Biex jiġu enfasizzati l-karatteristiċi ewlenin li huma essenzjali għat-twassil ta’ politika u riżultati ta’ adattament ta’ kwalità. Peress li l-impatti
  tat-tibdil fil-klima jeħtieġu rispons aktar sistemiku u urġenti, l-istrateġiji u l-pjanijiet ta’ adattament li ma
  jintegrawx l-oqsma kollha ta’ politika u li mhumiex inkorporati fit-teħid tad-deċiżjonijiet fil-livelli
  kollha ma għadhomx mezzi suffiċjenti biex dan isir. Għalhekk, il-prinċipji japplikaw għall-qafas ta’ politika nazzjonali ġenerali dwar l-adattament filwaqt li l-istrateġiji
  u l-pjanijiet ta’ adattament jappoġġaw it-twassil ta’ eżiti tajbin ta’ adattament.
• Biex jiġi pprovdut eżempju ta’ mudell li jiddeskrivi struttura għall-istrateġija li se tagħmilha aktar faċli biex jiġu
  aċċessati u mqabbla dawn l-istrateġiji u biex tiġi żgurata ħarsa ġenerali komparabbli tal-istat ta’ tħejjija u l-azzjonijiet
  ippjanati fil-livell tal-UE.
• It-tisħiħ tal-politika ta’ adattament b’oqsma ġodda.