Qafas Reġjonali ta’ Adattament għat-Tibdil fil-Klima għaż-Żoni tal-Baħar u tal-Kosta tal-Mediterran

L-objettiv ewlieni tal-Qafas huwa li jiddefinixxi approċċ strateġiku reġjonali biex tiżdied ir-reżiljenza tas-sistemi naturali u soċjoekonomiċi tal-baħar u kostali tal-Mediterran għall-impatti tat-tibdil fil-klima, filwaqt li jassisti lil dawk li jfasslu l-politika u lill-partijiet ikkonċernati fil-livelli kollha madwar il-Mediterran fl-iżvilupp u fl-implimentazzjoni ta’ politiki u ta’ miżuri koerenti u effettivi.

L-iżvilupp tal-Qafas kien iggwidat mill-viżjoni li sal-2025 iż-żoni tal-baħar u kostali tal-pajjiżi Mediterranji u l-komunitajiet tagħhom żiedu r-reżiljenza tagħhom għall-impatti negattivi tal-varjabbiltà u t-tibdil fil-klima, fil-kuntest tal-iżvilupp sostenibbli. Dan għandu jinkiseb permezz ta’ objettivi komuni, kooperazzjoni, solidarjetà, ekwità u governanza parteċipattiva.

L-enfasi tal-Qafas, b’mod koerenti mal-qafas legali stabbilit mill-Protokolli tal-Konvenzjoni ta’ Barċellona, hija fuq l-ambjenti tal-baħar u kostali tal-Mediterran. L-ambitu ġeografiku tagħha huwa dak tal-Konvenzjoni ta’ Barċellona, jiġifieri l-Baħar Mediterran u ż-żoni kostali tal-21 pajjiż li jmissu miegħu. Il-Qafas jirrikonoxxi li l-bidliet klimatiċi se jkollhom impatti li ma jirrispettawx il-konfini ta’ żona kostali kif normalment tiġi definita, u li jistgħu jkunu meħtieġa azzjonijiet ta’ adattament kostali aktar ’il ġewwa mill-kosta, b’mod partikolari fil-baċiri idrografiċi interni.

Wara l-approvazzjoni tal-Qafas mill-Partijiet Kontraenti għall-Konvenzjoni ta’ Barċellona fid-19-il Laqgħa Ordinarja tagħhom (COP 19, Ateni, il-Greċja, Frar 2016), is-sistema tal-Pjan ta’ Azzjoni tan-NU għall-Ambjent/il-Mediterran toffrih lil dawk li jfasslu l-politika u lill-partijiet ikkonċernati fir-reġjun tal-Mediterran bħala deskrizzjoni strutturata biex tiffaċilita l-identifikazzjoni ta’ objettivi strateġiċi, direzzjonijiet strateġiċi u prijoritajiet għall-adattament għat-tibdil fil-klima.