IR-REGOLAMENT (UE) 2020/741 TAL-PARLAMENT EWROPEW U TAL-KUNSILL tal-25 ta’ Mejju 2020 dwar ir-rekwiżiti minimi għall-użu mill-ġdid tal-ilma

Ir-Regolament dwar ir-rekwiżiti minimi għall-użu mill-ġdid tal-ilma għat-tisqija agrikola daħal fis-seħħ f’Mejju 2020. Ir-regoli l-ġodda se japplikaw mis-26 ta’ Ġunju 2023 u huma mistennija li jistimulaw u jiffaċilitaw l-użu mill-ġdid tal-ilma fl-UE.

L-użu mill-ġdid tal-ilma mormi ttrattat jista’ jitqies bħala provvista affidabbli tal-ilma, pjuttost indipendenti min-nixfa staġjonali u l-varjabbiltà tat-temp u kapaċi jkopri l-ogħla livelli tad-domanda għall-ilma. Dan jista’ jkun ta’ benefiċċju kbir għall-attivitajiet tal-biedja li jistgħu jiddependu fuq kontinwità affidabbli tal-provvista tal-ilma matul il-perjodu tat-tisqija, u b’hekk jitnaqqas ir-riskju ta’ falliment tal-għelejjel u telf ta’ introjtu. Kunsiderazzjoni xierqa għan-nutrijenti fl-ilma mormi ttrattat tista’ tnaqqas ukoll l-użu ta’ fertilizzanti addizzjonali li jirriżultaw fi ffrankar għall-ambjent, għall-bdiewa u għat-trattament tal-ilma mormi.

Ir-Regolament jistabbilixxi:

• Rekwiżiti minimi armonizzati tal-kwalità tal-ilma għall-użu mill-ġdid sikur tal-ilma mormi urban ittrattat fit-tisqija agrikola;
• Rekwiżiti minimi armonizzati ta’ monitoraġġ, b’mod partikolari l-frekwenza tal-monitoraġġ għal kull parametru ta’ kwalità, u rekwiżiti ta’ monitoraġġ tal-validazzjoni;
• Dispożizzjonijiet dwar il-ġestjoni tar-riskju biex jiġu vvalutati u indirizzati r-riskji potenzjali addizzjonali għas-saħħa u r-riskji ambjentali possibbli;
• Rekwiżiti tal-permessi;
• Dispożizzjonijiet dwar it-trasparenza, fejn l-informazzjoni ewlenija dwar kwalunkwe proġett għall-użu mill-ġdid tal-ilma ssir disponibbli għall-pubbliku.

Ir-regoli l-ġodda għandhom jitqiegħdu fil-kuntest tal-“Pjan ta’ Azzjoni għal Ekonomija Ċirkolari” adottat fl-2020, li jinkludi l-implimentazzjoni tar-Regolament il-ġdid fost il-prijoritajiet tal-Ewropa għall-ekonomija ċirkolari. Il-Pjan ta’ Azzjoni jħabbar ukoll li l-Kummissjoni se tiffaċilita l-użu mill-ġdid u l-effiċjenza tal-ilma f’setturi oħra, inkluż fil-proċessi industrijali.