L-użu tar-riżorsi tal-ilma ħelu fl-Ewropa

Messaġġi ewlenin:

B’mod ġenerali, l-astrazzjoni tal-ilma u t-tkabbir ekonomiku fl-UE wrew diżakkoppjament assolut matul il-perjodu 2000–2017. L-astrazzjoni totali tal-ilma naqset bi 17 %, filwaqt li l-valur miżjud gross totali ġġenerat mis-setturi ekonomiċi kollha żdied b’59 %. Madankollu, il-kundizzjonijiet tal-iskarsezza tal-ilma u l-avvenimenti ta’ nixfa għadhom jikkawżaw riskji sinifikanti fin-Nofsinhar tal-Ewropa, kif ukoll f’żoni speċifiċi ta’ reġjuni Ewropej oħra.

L-agrikoltura baqgħet is-settur li jeżerċita l-ogħla pressjoni fuq ir-riżorsi rinnovabbli tal-ilma ħelu b’mod ġenerali, u kienet responsabbli għal 59 % tal-użu totali tal-ilma fl-Ewropa fl-2017. Dan huwa prinċipalment minħabba l-livelli tal-agrikoltura fin-Nofsinhar tal-Ewropa.

Fl-2017, 64 % tal-astrazzjoni totali tal-ilma kienet mix-xmajjar u 24 % mill-ilma ta’ taħt l-art.

Ir-riżorsi annwali rinnovabbli tal-ilma ħelu għal kull abitant urew xejra ta’ tnaqqis fir-reġjuni kollha minbarra l-Ewropa tal-Lvant matul il-perjodu 1990-2017. Ġie osservat tnaqqis kbir fi Spanja (-65 %), f’Malta (-54 %) u f’Ċipru (-32 %). It-tibdil fil-klima u ż-żieda fil-popolazzjoni eżerċitaw pressjonijiet għoljin fuq ir-riżorsi rinnovabbli tal-ilma ħelu fl-Ewropa matul dan il-perjodu.

Il-frekwenza u d-daqs dejjem jiżdiedu ta’ nixfiet u għargħar estremi jsaħħu r-riskju li jkun hemm volumi mnaqqsa ta’ riżorsi rinnovabbli tal-ilma ħelu fil-futur.