Il-Kumitat Ewropew tar-Reġjuni (CoR)

Il-Kumitat Ewropew tar-Reġjuni (KtR) huwa l-vuċi tar-reġjuni u l-bliet fl-Unjoni Ewropea (UE). Huwa jirrappreżenta lill-awtoritajiet lokali u reġjonali madwar l-Unjoni Ewropea u jagħti pariri dwar liġijiet ġodda li għandhom impatt fuq ir-reġjuni u l-bliet (70 % tal-leġiżlazzjoni kollha tal-UE).

Il-KtR huwa assemblea politika magħmula minn 329 membru u 329 sostitut mill-pajjiżi kollha tal-UE (raggruppati skont il-partit politiku u mmexxija mill-President) li ġew eletti fil-livell lokali jew reġjonali (pereżempju bħala Sindki jew Presidenti ta’ reġjun). Huma jiġu Brussell sa sitt darbiet fis-sena biex jiddibattu l-opinjonijiet tagħhom dwar il-leġiżlazzjoni proposta u jaqblu dwar riżoluzzjonijiet għal azzjoni ulterjuri mill-UE. Il-membri tal-KtR għandhom mandat ta’ ħames snin, li jibda mid-data tal-ħatra uffiċjali tagħhom mill-Kunsill. Sitt kummissjonijiet (sottokumitati), magħmula minn membri u miġbura skont l-oqsma ta’ politika, janalizzaw it-testi leġislattivi abbozzati mill-Kummissjoni Ewropea u jfasslu opinjonijiet,li mbagħad jiġu diskussi u adottati fis-sessjonijiet plenarji tal-KtR. Kull sentejn u nofs, l-assemblea plenarja teleġġi l-President tal-KtR u l-Ewwel Viċi President. Il-President jirrappreżenta lill-Kumitat u jmexxi l-ħidma tiegħu. Il-membri tal-KtR huma appoġġjati minn amministrazzjoni mmexxija mis-Segretarju Ġenerali. 

Il-Kummissjoni Ewropea u l-Kunsill tal-Unjoni Ewropea għandhom jikkonsultaw lill-KtR kull meta jsiru proposti ġodda f’oqsma li għandhom riperkussjonijiet fil-livell reġjonali jew lokali: il-koeżjoni ekonomika, soċjali u territorjali, il-Fondi Strutturali, il-Fond Ewropew għall-Iżvilupp Reġjonali, il-Fond Soċjali Ewropew, l-impjiegi u l-affarijiet soċjali, l-edukazzjoni, iż-żgħażagħ, it-taħriġ vokazzjonali, il-kultura u l-isport, l-ambjent, l-enerġija u t-tibdil fil-klima, it-trasport, in-networks trans-Ewropej, u s-saħħa pubblika.