L-Uffiċċju tan-Nazzjonijiet Uniti għat-Tnaqqis tar-Riskju tad-Diżastri (UNISDR)

Maħluq f'Diċembru 1999, l-UNISDR huwa l-uffiċċju tan-Nazzjonijiet Uniti għat-tnaqqis tar-riskju ta' diżastri u huwa s-segretarjat tal-Istrateġija Internazzjonali għat-Tnaqqis tad-Diżastri. Il-mandat tal-UNISDR espanda fl-2001 biex iservi bħala l-punt fokali fis-sistema tan-Nazzjonijiet Uniti għall-koordinazzjoni tat-tnaqqis tad-diżastri u biex jiżgura sinerġiji fost l-attivitajiet għat-tnaqqis tad-diżastri tas-sistema tan-Nazzjonijiet Uniti u organizzazzjonijiet u attivitajiet reġjonali fl-oqsma soċjoekonomiċi u umanitarji (Riżoluzzjoni 56/195 tal-AĠ). Dan kien b'rispons għall-ħtieġa li t-tnaqqis tar-riskju ta' diżastri jiġi integrat fi ħdan l-iżvilupp u oqsma oħra ta' ħidma tan-NU. Id-"Dikjarazzjoni ta' Hyogo" u l-"Qafas ta' Hyogo għall-Azzjoni 2005-2015: Nibnu r-Reżiljenza tan-Nazzjonijiet u l-Komunitajiet għad-Diżastri" ġiet adottata mill-Konferenza Dinjija dwar it-Tnaqqis tad-Diżastri, li saret f'Kobe, Hyogo, il-Ġappun, f'Jannar 2005. Il-Qafas ta' Hyogo għall-Azzjoni (HFA) inkariga lill-UNISDR bl-appoġġ għall-implimentazzjoni tal-HFA.