Copernicus - il-Programm Ewropew ta' Osservazzjoni tad-Dinja

Copernicus, li qabel kien magħruf bħala GMES (Monitoraġġ Globali tal-Ambjent u s-Sigurtà), huwa l-Programm Ewropew għall-istabbiliment ta’ kapaċità Ewropea għall-Osservazzjoni tad-Dinja.
Copernicus jikkonsisti f’sett kumpless ta’ sistemi li jiġbru data minn diversi sorsi: satelliti għall-osservazzjoni tad-dinja u sensuri in situ bħal stazzjonijiet tal-art, sensuri fl-ajru u fil-baħar. Hija tipproċessa din id-data u tipprovdi lill-utenti b’informazzjoni affidabbli u aġġornata permezz ta’ sett ta’ servizzi relatati ma’ kwistjonijiet ambjentali u ta’ sigurtà.
Is-servizzi jindirizzaw sitt oqsma tematiċi: l-art, il-baħar, l-atmosfera, it-tibdil fil-klima, il-ġestjoni tal-emerġenzi u s-sigurtà. Huma jappoġġaw firxa wiesgħa ta' applikazzjonijiet, inkluż il-protezzjoni tal-ambjent, il-ġestjoni taż-żoni urbani, l-ippjanar reġjonali u lokali, l-agrikoltura, il-forestrija, is-sajd, is-saħħa, it-trasport, it-tibdil fil-klima, l-iżvilupp sostenibbli, il-protezzjoni ċivili u t-turiżmu.
L-utenti ewlenin tas-servizzi ta’ Copernicus huma dawk li jfasslu l-politika u l-awtoritajiet pubbliċi li jeħtieġu l-informazzjoni biex jiżviluppaw leġiżlazzjoni u politiki ambjentali jew biex jieħdu deċiżjonijiet kritiċi f’każ ta’ emerġenza, bħal diżastru naturali jew kriżi umanitarja.
Il-programm Copernicus huwa kkoordinat u ġestit mill-Kummissjoni Ewropea. L-iżvilupp tal-infrastruttura ta' osservazzjoni jitwettaq taħt il-patroċinju tal-Aġenzija Spazjali Ewropea għall-komponent spazjali u tal-Aġenzija Ewropea għall-Ambjent u l-Istati Membri għall-komponent in situ.