Sistema ta' Sistemi għall-Osservazzjoni Globali tad-Dinja (GEOSS) u GEO-Portal

Il-Grupp dwar l-Osservazzjonijiet tad-Dinja qed jikkoordina l-isforzi biex tinbena Sistema ta’ Sistemi għall-Osservazzjoni Globali tad-Dinja, jew GEOSS. Is-Sistema ta’ Sistemi għall-Osservazzjoni Globali tad-Dinja se tipprovdi għodod ta’ appoġġ għad-deċiżjonijiet lil varjetà wiesgħa ta’ utenti. Bħal fil-każ tal-Internet, il-GEOSS se jkun network globali u flessibbli ta’ fornituri tal-kontenut li jippermetti lil dawk li jieħdu d-deċiżjonijiet jaċċessaw firxa straordinarja ta’ informazzjoni fuq l-iskrivanija tagħhom.

Is-Sistema ta’ Sistemi għall-Osservazzjoni Globali tad-Dinja qed tindirizza simultanjament disa’ oqsma ta’ importanza kritika għan-nies u għas-soċjetà: id-diżastri, is-saħħa, l-enerġija, il-klima, l-ilma, it-temp, l-ekosistemi, l-agrikoltura u l-bijodiversità.

Din is-“sistema ta’ sistemi” se tgħaqqad b’mod proattiv is-sistemi ta’ osservazzjoni eżistenti u ppjanati madwar id-dinja u tappoġġa l-iżvilupp ta’ sistemi ġodda fejn bħalissa jeżistu lakuni.

Se tippromwovi standards tekniċi komuni sabiex id-data mill-eluf ta’ strumenti differenti tkun tista’ tiġi kkombinata f’settijiet ta’ data koerenti.

Il-GEOPortal”joffri punt uniku ta’ aċċess għall-Internet għall-utenti li jkunu qed ifittxu pakketti ta’ data, stampi u software analitiku rilevanti għall-partijiet kollha tad-dinja. Dan jgħaqqad lill-utenti ma’ bażijiet tad-data u portali eżistenti u jipprovdi informazzjoni affidabbli, aġġornata u faċli għall-utent – vitali għall-ħidma ta’ dawk li jieħdu d-deċiżjonijiet, dawk li jippjanaw u l-maniġers tal-emerġenza.

Għall-utenti b’aċċess limitat jew mingħajr aċċess għall-Internet, informazzjoni simili hija disponibbli permezz tan-netwerk “GEONETCast”ta’ satelliti tat-telekomunikazzjoni.