L-Inizjattiva Internazzjonali dwar il-Klima

 Mill-2008, l-Inizjattiva Internazzjonali dwar il-Klima (IKI) tal-Ministeru Federali Ġermaniż għall-Ambjent, il-Konservazzjoni tan-Natura, il-Bini u s-Sikurezza Nukleari (BMUB) ilha tiffinanzja proġetti dwar il-klima u l-bijodiversità f’pajjiżi li qed jiżviluppaw u f’pajjiżi li għadhom kif ġew industrijalizzati, kif ukoll f’pajjiżi fi tranżizzjoni. Abbażi ta’ deċiżjoni meħuda mill-parlament Ġermaniż (Bundestag), somma ta’ mill-inqas EUR 120 miljun hija disponibbli għall-użu mill-inizjattiva kull sena. Għall-ewwel ftit snin l-IKI kienet iffinanzjata permezz tal-irkantar tal-kwoti tal-emissjonijiet, iżda issa hija ffinanzjata mill-baġit tal-BMUB. L-IKI hija element ewlieni tal-finanzjament għall-klima tal-Ġermanja u l-impenji ta’ finanzjament fil-qafas tal-Konvenzjoni dwar id-Diversità Bijoloġika. L-Inizjattiva tagħmel enfasi ċara fuq il-mitigazzjoni tat-tibdil fil-klima, l-adattament għall-impatti tat-tibdil fil-klima u l-protezzjoni tad-diversità bijoloġika. Dawn l-isforzi jipprovdu diversi kobenefiċċji, b’mod partikolari t-titjib tal-kundizzjonijiet tal-għajxien fil-pajjiżi sħab.