L-adattament tal-Mediterran għat-tibdil fil-klima (LIFE MEDACC)

Il-proġett għandu l-għan li jittestja soluzzjonijiet innovattivi biex is-sistemi agroforestali u urbani jiġu adattati għat-tibdil fil-klima fil-baċir tal-Mediterran. Se jkun hemm enfasi fuq it-tfassil u l-implimentazzjoni ta’ strateġiji u politiki adattivi fil-livell nazzjonali u reġjonali u l-proġett se jikkontribwixxi għall-implimentazzjoni tal-Istrateġija Katalana għall-Adattament għat-Tibdil fil-Klima (ESCACC 2013-2020).

It-tliet setturi ewlenin fejn se jiġu implimentati azzjonijiet pilota ta’ adattament huma l-agrikoltura, il-forestrija u l-ġestjoni tal-ilma u l-parteċipazzjoni tal-partijiet ikkonċernati lokali hija kruċjali għall-valutazzjoni tal-azzjonijiet ta’ adattament żviluppati. Il-proġett iffoka fuq tliet baċiri idrografiċi speċifiċi fil-Katalonja (il-Muga, Ter u Segre), magħżula biex jirrappreżentaw id-diversità Mediterranja fuq skala lokali. 

Ir-riżultati mistennija se jikkontribwixxu biex jiġi kkwantifikat kif il-miżuri ta’ adattament jistgħu jnaqqsu l-vulnerabbiltà tas-sistemi naturali u tal-attivitajiet tal-bniedem għat-tibdil fil-klima. Barra minn hekk, il-proġett se jivvaluta l-kostijiet ambjentali u ekonomiċi relatati mal-applikazzjoni jew man-nuqqas ta’ applikazzjoni tal-miżuri ta’ adattament.