Ekonomija għall-Prevenzjoni u t-Tħejjija għad-Diżastri (Economics for Disaster Prevention and Preparedness)

Il-proġett tal-Ekonomija għall-Prevenzjoni u t-Tħejjija għad-Diżastri ġie żviluppat mid-Direttorat Ġenerali tal-Kummissjoni Ewropea għall-Protezzjoni Ċivili u l-Operazzjonijiet tal-Għajnuna Umanitarja Ewropej (DĠ ECHO) u mill-Bank Dinji u ffinanzjat taħt il-Programm ta’ Ħidma Annwali 2020 tal-Mekkaniżmu tal-Unjoni għall-Protezzjoni Ċivili (UCPM). L-għan tal-proġett kien li jipprovdi evidenza li tiggwida lil dawk li jfasslu l-politika u lill-prattikanti biex jagħmlu investimenti intelliġenti li jistgħu jsaħħu r-reżiljenza għad-diżastri u għall-klima b’mod li jwassal benefiċċji soċjali, ekonomiċi u ambjentali.

Ir-rapporti żviluppati fi ħdan il-qafas ta’ dan il-proġett jenfasizzaw l-importanza li jissaħħu l-prevenzjoni, it-tħejjija u r-rispons ta’ emerġenza, li jgħinu biex jitnaqqsu r-riskji ta’ diżastri u klimatiċi għan-nies, tittejjeb is-sostenibbiltà, u jissaħħaħ il-benesseri tal-pajjiżi Ewropej.

B’mod partikolari, ġew prodotti tliet rapporti: 

- Investiment fil-Ġestjoni tar-Riskju ta’ Diżastri fl-Ewropa Jagħmel Sens Ekonomiku: dan ir-rapport janalizza aktar minn 70 studju tal-każijiet li juru li l-benefiċċji tal-investiment f’sistemi ta’ twissija bikrija, infrastruttura ekoloġika u reżiljenti ġeneralment jegħlbu l-kostijiet. Meta jiġu żviluppati investimenti b’approċċ ta’ perikli multipli, dawn il-benefiċċjijsiru saħansitra akbar.

- Riskju Finanzjarju u Opportunitajiet għall-Bini tar-Reżiljenza fl-Ewropa: dan ir-rapport jivvaluta l-impatti makrofiskali tat-terremoti u l-għargħar fl-Istati Membri tal-UE, janalizza l-istrumenti finanzjarji fis-seħħ għall-ġestjoni ta’ dan ir-riskju u jidentifika kwalunkwe diskrepanza fil-finanzjament assoċjata. Jenfasizza li l-aċċess għal finanzjament irranġat minn qabel jista' jnaqqas l-impatti tad-diżastri fuq in-nies, l-ekonomiji u l-baġits tal-gvernijiet;

- Fehim tal-Ħtiġijiet tal-Aġenziji tal-Protezzjoni Ċivili u Opportunitajiet biex Jiżdiedu l-Investimenti fil-Ġestjoni tar-Riskju ta’ Diżastri: l-objettiv ta’ dan ir-rapport huwa li jiġbor fil-qosor l-għarfien u jipprovdi rakkomandazzjonijiet relatati mal-isfidi u l-opportunitajiet għall-aġenziji tal-protezzjoni ċivili (CP) biex jiġu ingranati l-investimenti għall-prevenzjoni u t-tħejjija għad-diżastri. Dan ir-rapport huwa bbażat fuq is-sejbiet tal-konsultazzjonijiet mal-partijiet ikkonċernati u l-analiżi dokumentarja relatati ma’ erbatax-il pajjiż b’sistemi differenti ta’ ġestjoni tar-riskju ta’ diżastri (DRM), mekkaniżmi finanzjarji, kapaċità istituzzjonali, u esponiment għad-diżastri.

Barra minn hekk, il-proġett żviluppa infografika kif ukoll sessjonijiet ta’ taħriġ online: 

• Sessjoni ta' Taħriġ Online 1 - Immudellar tar-riskji ta' diżastri fl-Ewropa
• Sessjoni ta’ Taħriġ Online 2 - Riskju finanzjarju u opportunitajiet biex tinbena r-reżiljenza
• Sessjoni ta’ Taħriġ Online 3 - Analiżi tal-kostijiet u l-benefiċċji tal-investimenti fil-prevenzjoni u t-tħejjija għad-diżastri