Foresta: Adattament għat-Tibdil fil-Klima (LIFE FORECCAsT)

L-objettiv ewlieni tal-proġett LIFE FORECCAsT huwa li jipprovdi lis-sidien tal-foresti u lill-maniġers tal-Parc Naturel Régional du Haut Languedoc bil-mezzi biex jibnu l-istrateġija ta’ ġestjoni tagħhom, filwaqt li jqisu x-xenarji tat-tibdil fil-klima, sabiex jipproteġu l-ekosistemi territorjali tal-foresti u jiżguraw settur tal-forestrija dinamiku f’konformità mal-isfidi ambjentali, ekonomiċi u soċjali.

Biex jintlaħaq dan l-objettiv ġenerali, huma previsti l-għanijiet speċifiċi li ġejjin:

• Li jiġu żviluppati metodoloġiji u għodod li jgħinu fit-teħid tad-deċiżjonijiet għas-settur tal-forestrija u tal-injam, sabiex jiġu antiċipati u integrati aħjar ir-riskji identifikati f'xenarji differenti tat-tibdil fil-klima;
• Li jiġu inkorporati osservazzjonijiet fuq il-post sabiex tittejjeb l-utilità tal-għodda tat-teħid tad-deċiżjonijiet żviluppata mill-proġett, FORECCAsT;
• Li ssir lista ta’ bijoindikaturi li se jiffurmaw il-bażi ta’ sistema ta’ monitoraġġ dwar l-effetti tat-tibdil fil-klima fuq il-bijodiversità tal-imsaġar;
• Li jiġu protetti l-ekosistemi vulnerabbli, b’mod partikolari l-ħabitats naturali ta’ interess komunitarju fil-Parc Naturel Régional du Haut Languedoc;
• Li jitressqu strateġiji ta’ adattament għall-forestrija u r-riżorsi ġenetiċi f’konformità mal-livelli ta’ riskju. L-istrateġiji jinkludu sistemi ta’ produzzjoni alternattivi u fehim aħjar tal-bijodiversità u r-riskju ta’ nirien fil-foresti;
• Li jiġu ssuġġeriti proċeduri ta’ analiżi u reazzjoni ta’ wara l-avveniment sabiex il-maniġers tal-foresti jiġu pprovduti bi pjan ta’ azzjoni f’każ ta’ kriżijiet relatati mal-klima;
• Li titqajjem kuxjenza fis-settur kollu tal-injam tal-forestrija dwar ir-riskji futuri u l-ħtieġa li tittieħed azzjoni issa biex tiġi protetta l-industrija; u
• Li titqajjem kuxjenza fost il-popolazzjonijiet lokali dwar dawn il-kwistjonijiet billi jiġu spjegati l-isfidi u l-għażliet possibbli, kif ukoll il-modifiki futuri.