Għajnuna għat-titjib tal-funzjonijiet tal-ħamrija u l-adattament għat-tibdil fil-klima permezz ta’ tekniki agrikoli ta’ konservazzjoni sostenibbli (LIFE HELPSOIL)

Il-proġett LIFE HelpSoil kellu l-għan li jittestja soluzzjonijiet innovattivi u juri prattiki ta’ ġestjoni tal-ħamrija biex tittejjeb il-kwalità tal-ħamrija, sabiex is-sistemi agrikoli jsiru aktar reżiljenti għat-tibdil fil-klima. L-objettivi speċifiċi tal-proġett kienu jinkludu: (i) l-implimentazzjoni ta’ prattiki biex jittejbu s-sekwestru tal-karbonju organiku fil-ħamrija, il-fertilità tal-ħamrija u l-bijodiversità, u l-protezzjoni kontra l-erożjoni f’għadd ta’ azjendi agrikoli, bil-għan li jiżdiedu s-sostenibbiltà u l-kompetittività agrikoli; (ii) l-integrazzjoni ta’ prattiki ta’ konservazzjoni u tekniki innovattivi sabiex tiżdied l-effiċjenza tal-irrigazzjoni, tittejjeb l-effiċjenza tal-fertilizzanti, b’mod partikolari d-demel tal-bhejjem, u jiġi limitat l-użu tal-pestiċidi; u (iii) l-iżvilupp ta’ indikaturi tal-funzjonijiet tal-ekosistema tal-ħamrija u tekniki ġodda biex jiġu vvalutati l-benefiċċji ambjentali tal-prattiki ttestjati mill-proġett.

Il-proġett LIFE HelpSoil implimenta u ttestja prattiki ta’ konservazzjoni tal-ħamrija f’20 azjenda agrikola sperimentali fil-Pjanura tal-Po, fit-Tramuntana tal-Italja, fuq tliet staġuni ta’ tkabbir. Il-proġett integra tekniki innovattivi u l-aħjar prattiki għall-konservazzjoni tal-ħamrija u l-kontroll tal-erożjoni (eż. iż-żrigħ mingħajr ħrit, il-ħdim tal-istrixxi u l-għelejjel ta’ kopertura); it-tnaqqis tal-konsum tal-ilma matul it-tisqija (eż. it-tisqija bil-mikroqatra, it-tisqija bil-fert u t-tisqija taħt il-wiċċ); tekniki ġodda ta’ fertilizzazzjoni bl-użu tad-demel tal-bhejjem (eż. sistemi ta’ distribuzzjoni taħt l-art); u prattiki innovattivi għall-kontroll tal-mard tal-pjanti (eż. l-użu ta’ fertilizzanti naturali biex jinkoraġġixxu l-mikroorganiżmi fir-riżosfera). L-aktar tekniki xierqa ġew implimentati f’kull wieħed mill-azjendi agrikoli sperimentali.

Ir-riżultati wrew li dawn il-prattiki tejbu l-funzjonijiet tal-ħamrija u, minħabba li huma tekniki agrikoli sostenibbli, appoġġaw l-adattament għat-tibdil fil-klima. Il-prattiki tejbu l-karatteristiċi tal-ħamrija, inkluż il-kontenut tal-karbonju organiku u l-fertilità bijoloġika, u wasslu għal użu aktar effiċjenti tal-ilma tat-tisqija, tal-fertilizzanti u tal-pestiċidi fl-irqajja’ sperimentali. Barra minn hekk, il-mitigazzjoni tat-tibdil fil-klima ġiet appoġġata bħala riżultat tal-prattiki, permezz ta’ żieda fis-sekwestru tas-CO2 fil-ħamrija, tnaqqis fil-konsum tal-fjuwils fossili għax-xogħol agrikolu bħall-ħrit, u tnaqqis fl-emissjonijiet tal-gassijiet serra u tal-ammonijaka mill-ħamrija. It-tnaqqis fil-konsum tal-enerġija, fil-medda ta’ bejn 15 u 55 %, jirrappreżenta wkoll iffrankar tal-kostijiet minħabba tnaqqis fl-użu tal-fjuwil, tal-fertilizzanti, tal-erbiċidi, tal-ilma u ta’ oġġetti konsumabbli oħra bħaż-żrieragħ u l-kompost. Il-livell ta’ benefiċċju jiddependi fuq diversi fatturi ambjentali (eż. it-tip ta’ ħamrija, il-klima) u fatturi tekniċi (eż. it-tip ta’ għalla) li jvarjaw għal kull farm ta’ dimostrazzjoni.