Programm Ungeriż għall-prevenzjoni u t-taħriġ tan-nirien fil-foresti (FIRELIFE)

L-inċidenza ta’ nirien fil-foresti żdiedet ħafna f’dawn l-aħħar ftit deċennji fl-Ungerija. Mhux biss il-frekwenza tan-nirien żdiedet, iżda wkoll l-intensità tagħhom u l-veloċità li biha jinfirxu. Dan huwa minħabba l-estremitajiet klimatiċi, inqas xita, iż-żieda fit-temperatura medja annwali u serje ta’ xtiewi mingħajr borra.

L-objettiv ġenerali ta' FIRELIFE kien li jtejjeb il-prevenzjoni effettiva, proattiva u kontinwa tan-nirien fil-foresti fl-Ungerija. Il-proġett kellu l-għan li jipprovdi informazzjoni u messaġġi mmirati abbażi ta’ pjan qafas ta’ komunikazzjoni aġġornat, bi gruppi fil-mira involuti wkoll permezz ta’ kuntatt personali. Peress li 99 % tan-nirien fil-foresti huma kkawżati mill-attività tal-bniedem fl-Ungerija, il-komunikazzjoni mmirata u istantanja tista’ tnaqqas b’mod effettiv l-għadd ta’ nirien fil-foresti. L-għan kien li jiġu organizzati korsijiet ta’ taħriġ għall-għalliema, il-ħaddiema soċjali u l-indokraturi tal-azjendi agrikoli, kif ukoll għall-esperti tal-prevenzjoni tan-nirien fil-foresti (forestiera, konservazzjonisti, ħaddiema tat-tifi tan-nar). Il-korsijiet tfasslu biex jibnu relazzjonijiet u jtejbu l-kooperazzjoni bejn l-aġenziji dwar il-prevenzjoni tan-nirien fil-foresti.

Il-proġett għallem lill-għalliema, lill-ħaddiema soċjali, lill-bdiewa u lill-esperti tal-prevenzjoni tan-nirien fil-foresti biex itejbu l-prevenzjoni tan-nirien fil-foresti madwar il-pajjiż. B’riżultat ta’ dan, l-għadd ta’ nirien fil-foresti naqas bi kważi terz, u d-daqs taż-żona li saritilha l-ħsara naqas bi kważi 90 %. Pajjiżi oħra jistgħu jsegwu l-lista ta’ kontroll ta’ FIRELIFE biex jiżviluppaw is-sistemi u l-għodod tagħhom stess għall-prevenzjoni tan-nirien.