Ir-rikonċiljazzjoni tal-Adattament, il-Mitigazzjoni u l-Iżvilupp Sostenibbli għall-Bliet (RAMSES)

L-għan ewlieni ta’ dan il-proġett ta’ riċerka kien li jagħti evidenza kwantitattiva tal-impatti tat-tibdil fil-klima u l-ispejjeż u l-benefiċċji ta’ firxa wiesgħa ta’ miżuri ta’ adattament, b’enfasi fuq iż-żoni urbani. RAMSES involva ruħu mal-partijiet ikkonċernati sabiex irawwem ir-rilevanza politika tal-għarfien miġbur, u sabiex jiffaċilita t-tfassil u l-implimentazzjoni tal-istrateġiji ta’ adattament fl-UE u lil hinn minnha. Il-karatteristiċi tal-bliet u l-interkonnessjonijiet tagħhom ġew identifikati u użati biex jipprovdu l-kuntest lokali għall-valutazzjoni, f’approċċ integrat minn fuq għal isfel u minn isfel għal fuq immirat lejn il-kwantifikazzjoni tar-riskji, il-vulnerabbiltajiet u d-danni minħabba t-tibdil fil-klima. Ġew stmati l-kostijiet u l-benefiċċji assoċjati tal-adattament sabiex jiġi appoġġat it-tfassil ta’ strateġiji ta’ tranżizzjoni sostenibbli fiż-żoni urbani. RAMSES ipprovda bażi ta’ evidenza utli biex jitnaqqsu l-ispejjeż ta’ adattament u biex ikun hemm fehim u aċċettazzjoni aħjar tal-miżuri ta’ adattament fil-bliet.

Minbarra l-kontributi xjentifiċi, ġie eżaminat il-kuntest politiku u istituzzjonali fil-bliet ta’ studju tal-każijiet, li jippermetti l-identifikazzjoni ta’ mekkaniżmi li jsawru tfassil ta’ politika konkret. Dan iċċara li trid isseħħ bidla minn kunsiderazzjonijiet purament tekniċi u/jew sempliċi tal-kostijiet-benefiċċji, u li l-partijiet ikkonċernati tal-bliet jeħtieġu portafoll ta’ għażliet aktar milli perkors ottimali wieħed, bl-għoti tas-setgħa lin-nies ikun element fundamentali fiż-żieda tal-aċċettazzjoni tal-miżuri ta’ adattament għat-tibdil fil-klima.

L-eżiti ewlenin tar-RAMSES kienu jinkludu:

• Qafas strateġiku għat-teħid ta’ deċiżjonijiet ta’ adattament ibbażat fuq l-evidenza.
• Analiżi f’diversi livelli li tintegra l-approċċ lokali tradizzjonali tal-bliet għall-istrateġiji ta’ adattament f’qafas komprensiv minn isfel għal fuq/minn fuq għal isfel li qies il-kostijiet fil-livelli nazzjonali, tal-UE u internazzjonali.
• Qafas għall-valutazzjoni tal-kostijiet ekonomiċi u l-benefiċċji tal-adattament, b’metodoloġiji żviluppati biex jitqiesu kemm il-kostijiet diretti kif ukoll dawk indiretti tal-impatti relatati mal-klima.
• Studji tal-każijiet fil-bliet u azzjonijiet ta’ involviment tal-partijiet ikkonċernati li enfasizzaw ir-rilevanza tal-qafas għal dawk li jfasslu l-politika u aċċettabbiltà akbar ta’ miżuri ta’ adattament għal partijiet ikkonċernati oħra.
• Sett ta’ għodod faċli għall-utent għall-partijiet ikkonċernati tal-bliet li jittrattaw id-deċiżjonijiet ta’ adattament u mitigazzjoni. Dan jinkludi Manwal ta’ Tranżizzjoni (gwida pass pass), materjali ta’ taħriġ, u applikazzjoni ta’ gwida awdjoviżiva bbażata fuq il-web.