RESilient transport InfraSTructure to extreme events (RESIST)

Il-kundizzjonijiet estremi tat-temp, it-tibdil fil-klima, id-danni lill-infrastruttura (ikkawżati minn perikli naturali u kkawżati mill-bniedem) u l-impedimenti tat-traffiku għandhom impatt negattiv fuq l-affidabbiltà tas-soluzzjonijiet ta’ mobbiltà. Jeħtieġ li jiġu żviluppati analiżi tar-riskju, miżuri u strateġiji ta’ adattament li jippermettu l-minimizzazzjoni tal-impatt ta’ avvenimenti estremi kemm naturali kif ukoll ikkawżati mill-bniedem fuq l-operat tat-trasport mingħajr xkiel.

L-għan ġenerali tar-RESIST huwa li tiżdied ir-reżiljenza tal-operat tat-trasport mingħajr xkiel għal avvenimenti estremi naturali u kkawżati mill-bniedem, li jiġu protetti l-utenti tal-infrastruttura Ewropea tat-trasport u li tiġi pprovduta informazzjoni ottimali lill-operaturi u lill-utenti tal-infrastruttura tat-trasport. Il-proġett se jindirizza l-impatt tat-tipi kollha ta’ inċidenti fiżiċi, naturali u kkawżati mill-bniedem estremi u attakki ċibernetiċi fuq il-pontijiet u l-mini. It-teknoloġija RESIST se tiġi skjerata u vvalidata f’żewġ proġetti pilota f’kundizzjonijiet u infrastrutturi reali.

B’mod partikolari, ir-RESIST se tiżviluppa pjattaforma ta’ sikurezza/sigurtà integrata, interoperabbli u skalabbli biex toffri livelli għoljin ta’ reżiljenza fl-infrastruttura tat-trasport u tiffoka fuq tliet livelli ewlenin:

• iżżid ir-reżiljenza fiżika tal-pontijiet/mini permezz ta’ spezzjoni robotika u analitika ta’ tbassir;
• ir-restawr tas-servizzi/rotot lura għan-normal u l-iżgurar ta’ fluss kontinwu ta’ passiġġieri u merkanzija bejn modi differenti ta’ trasport ftit wara avveniment estrem;
• komunikazzjoni ċara u effettiva tal-operaturi u l-utenti tat-trasport, ta’ dawk li jintervjenu f’emerġenza u tal-pubbliku biex jiġi minimizzat l-impatt tat-tfixkil fuq in-nies u n-negozji.

L-eżiti tal-proġett se jippermettu l-ġbir, l-ipproċessar u t-tixrid ta’ informazzjoni għall-ippjanar alternattiv tar-rotot. Ir-riżultat se jkun it-tħaffif tal-komunikazzjoni f’ħin reali, fattur li jikkontribwixxi għall-operazzjonijiet tat-trasport mingħajr xkiel. L-istrateġiji se jitfasslu kif ġej:

• strateġiji preventivi u ta’ previżjoni għar-reżiljenza tan-network tat-trasport f’termini ta’ vulnerabbiltà u analiżi ta’ previżjoni u valutazzjoni tar-riskju;
• strateġiji reattivi f’termini ta’ komunikazzjoni sigura ta’ emerġenza u spezzjoni rapida u preċiża tal-ħsara strutturali fuq talba fuq strutturi kritiċi tat-trasport wara diżastru.