Adattament għat-tibdil fil-klima

It-tibdil fil-klima se jimmodifika l-livelli ta’ riskju attwali u għalhekk se jisfida l-linji gwida u l-proċeduri tad-disinn għat-tħaddim u l-manutenzjoni tal-infrastruttura tat-toroq. Se jkun hemm żieda f’avvenimenti klimatiċi mhux tas-soltu, b’impatti sinifikanti fuq l-infrastruttura, l-operazzjonijiet, u l-ekonomija kollha kemm hi. Għas-sidien tat-toroq, l-adattament għat-tibdil fil-klima għandu jiġi inkluż fil-proċeduri attwali u futuri li jkopru l-aspetti kollha tal-ippjanar, id-disinn, il-manutenzjoni u t-tħaddim tat-toroq. It-tibdil fil-klima, kif deskritt mill-projezzjonijiet minn mudelli globali u reġjonali, se jġib miegħu għadd ta' sfidi għan-netwerk tat-toroq fl-Ewropa. Fil-biċċa l-kbira tal-każijiet, dawn se jkunu l-istess sfidi bħal-lum, iżda fuq skala akbar, li jseħħu b’mod aktar frekwenti u f’postijiet oħra milli mistenni. Barra minn hekk, jistgħu jiġu esperjenzati aktar kombinazzjonijiet tat-temp mhux tas-soltu, eż. għargħar tax-xitwa. F’xi każijiet, it-tibdil fil-klima jista’ jkun ta’ benefiċċju għas-sidien tat-toroq, eż. f’postijiet fejn jista’ jkun mistenni inqas borra.