L-adattament għat-tibdil fil-klima, il-gvernijiet huma ppreparati?

Dan ir-rapport konġunt jippreżenta awditu kooperattiv ibbażat fuq tmien rapporti tal-awditjar nazzjonali individwali mill-Awstrija, il-Bulgarija, Ċipru, Malta, in-Netherlands, in-Norveġja, ir-Russja u l-Ukrajna, u studju ta’ ġbir ta’ informazzjoni mill-Qorti Ewropea tal-Awdituri. Dan jiżvela li t-tmien pajjiżi jinsabu fi stadju bikri fl-adattament għat-tibdil fil-klima, u, s’issa, l-attivitajiet ta’ adattament huma relatati mal-identifikazzjoni tar-riskju u l-vulnerabbiltajiet u sa ċertu punt mal-iżvilupp tal-politika.

Għalkemm l-awditi nazzjonali jiżvelaw li l-biċċa l-kbira tal-pajjiżi ħejjew valutazzjonijiet tar-riskju u tal-vulnerabbiltà ta’ kwalità suffiċjenti, tnejn minnhom biss kienu żviluppaw strateġija ta’ adattament komprensiva. Ir-rapport jiddiskuti l-fatt li fil-biċċa l-kbira tal-pajjiżi, jiġu identifikati dgħufijiet fil-koordinazzjoni tal-adattament, u hemm ukoll nuqqas ġenerali ta’ stimi tal-kostijiet tal-impatti tat-tibdil fil-klima jew tal-miżuri ta’ adattament fid-dokumenti ta’ politika. Dan iżid ir-riskju li l-kwistjonijiet tat-tibdil fil-klima u tal-adattament mhumiex qed jiġu indirizzati biżżejjed fil-proċessi tat-teħid tad-deċiżjonijiet.