Analiżi tar-Rapportar dwar il-Finanzjament għall-Klima tal-Unjoni Ewropea

Dan l-istudju huwa kkummissjonat mill-ACT Alliance EU sabiex tiġi stabbilita ħarsa ġenerali lejn il-finanzjament għall-klima pprovdut mill-istituzzjonijiet tal-UE u mill-Istati Membri tal-UE lill-pajjiżi li qed jiżviluppaw. Ir-rapport jinkludi flussi finanzjarji mill-Kummissjoni Ewropea (KE), il-Fond Ewropew għall-Iżvilupp (FEŻ), il-Bank Ewropew tal-Investiment (BEI) u Stati Membri individwali tal-UE.

Ir-rapporti biennali mill-istituzzjonijiet tal-UE lill-UNFCCC jinkludu l-finanzjament għall-klima mill-KE, mill-FEŻ u mill-BEI. Kull Ottubru, iċ-ċifra totali tal-finanzjament għall-klima tal-UE tiġi ppubblikata wara laqgħa fil-Kunsill Affarijiet Ekonomiċi u Finanzjarji (ECOFIN), li jiddetermina l-finanzjament totali għall-klima mill-UE u l-Istati Membri tagħha permezz tar-rapportar tar-Regolament dwar il-Mekkaniżmu ta’ Monitoraġġ (MMR) tal-UE f’Settembru ta’ kull sena. Il-finanzjament totali għall-klima mill-istituzzjonijiet tal-UE u l-Istati Membri tal-UE żdied b’mod sinifikanti minn EUR 9.5 biljun fl-2013 għal EUR 20.2 biljun fl-2016. L-akbar sehem ta’ dan ġie minn Stati Membri individwali, li wasslu EUR 15,5 biljun fl-2016. Mill-parti li jifdal, EUR 2,7 biljun ittieħdu mill-baġit tal-UE u mill-FEŻ, filwaqt li EUR 1,9 biljun ġew ipprovduti mill-BEI.