Valutazzjoni tal-Implikazzjonijiet tal-Adattament għat-Tibdil fil-Klima fuq l-Impjiegi fl-UE

L-impjiegi ta’ adattament huma kollha impjiegi maħluqa, sostnuti jew definiti mill-ġdid fil-proċess lejn il-bini ta’ reżiljenza għall-impatti eżistenti u mbassra tat-tibdil fil-klima.

L-għan ġenerali ta’ dan l-istudju huwa li jifhem u jimla l-lakuni fl-għarfien fir-rigward tal-implikazzjonijiet tal-adattament għat-tibdil fil-klima fuq l-impjiegi u l-ħiliet tal-UE. Bħala parti mill-integrazzjoni tal-adattament għat-tibdil fil-klima fil-politiki tal-UE, ir-riżultati ta’ dan l-istudju jidentifikaw ukoll il-politiki tal-UE dwar l-impjiegi u dawk soċjali, li jistgħu jippromwovu t-tranżizzjoni lejn ekonomija tal-UE reżiljenti għall-klima, inkluż l-għoti ta’ ħiliet adegwati.

Għall-fini tal-kwantifikazzjoni tal-impatti tal-adattament għat-tibdil fil-klima fuq l-impjiegi, ġew żviluppati żewġ xenarji bażi (4 gradi u 2 gradi bidla fit-temperatura sal-2100 meta mqabbla mal-livelli preindustrijali) kif ukoll referenza u xenarju ambizzjuż.

Fil-livell tal-UE, ir-riżultati tal-immudellar tal-impatti tat-tibdil fil-klima fuq l-impjiegi juru li d-danni (jew il-benefiċċji) tat-tibdil fil-klima se jkollhom effett fuq il-produttività ta’ diversi setturi ekonomiċi u l-produzzjoni u l-impjiegi tagħhom. Dan se jirriżulta f’telf (jew qligħ) fl-impjieg. Fil-livell tal-Istati Membri dan juri li t-tibdil fil-klima se jaffettwa s-swieq tax-xogħol fir-reġjuni Ewropej b’mod differenti skont is-setturi ekonomiċi ewlenin u l-kundizzjonijiet klimatiċi tagħhom.

Biex jiġu vvalutati b’mod kwantitattiv l-impatti tal-azzjoni ta’ adattament fuq l-impjiegi fl-UE, referenza u xenarju ambizzjuż stmaw il-bidliet relattivi fl-impjiegi minħabba l-infiq fuq l-adattament għat-tibdil fil-klima meta mqabbel mal-linja bażi.

Minbarra li pprovda stimi dwar l-għadd ta’ impjiegi maħluqa u mitlufa minħabba l-adattament għat-tibdil fil-klima, l-istudju mmappja wkoll il-ħiliet meħtieġa għat-twettiq ta’ attivitajiet ta’ adattament u vvaluta d-diskrepanzi u n-nuqqasijiet fil-ħiliet. B’riżultat ta’ din l-analiżi qed jiġu ppreżentati rakkomandazzjonijiet ta’ politika għall-bini ta’ Ewropa aktar reżiljenti.