Valutazzjoni tal-potenzjal ta' approċċi bbażati fuq l-ekosistema għall-adattament u l-mitigazzjoni tat-tibdil fil-klima fl-Ewropa

Dan l-istudju kellu l-għan li jindirizza l-lakuni attwali fl-għarfien rigward l-adozzjoni u l-implimentazzjoni ta’ approċċi bbażati fuq l-ekosistema u b’hekk jinkiseb fehim aħjar tar-rwol u l-potenzjal tagħhom fl-adattament u l-mitigazzjoni tat-tibdil fil-klima fl-Ewropa. Bażi tad-data ta’ 161 proġett applikabbli, ħames studji ta’ każijiet fil-fond, intervisti mmirati ma’ uffiċjali tal-Kummissjoni Ewropea u rieżami tal-letteratura servew bħala l-bażi għal din il-valutazzjoni. Bl-użu ta’ dawn is-sorsi, dan l-istudju fittex li jixħet dawl fuq il-fatturi ta’ suċċess li jwasslu għall-implimentazzjoni ta’ approċċi bbażati fuq l-ekosistema fil-programmi dwar it-tibdil fil-klima fil-livelli lokali, reġjonali, nazzjonali u transnazzjonali u l-ostakli li jfixkluha u jipprovdi rakkomandazzjonijiet xierqa biex jingħelbu l-ostakli eżistenti. Barra minn hekk, inġabret evidenza dwar il-kostijiet u l-benefiċċji ta’ approċċi bbażati fuq l-ekosistema u tqabblet mal-kostijiet u l-benefiċċji ta’ approċċi ta’ inġinerija tradizzjonali għall-indirizzar tat-tibdil fil-klima u l-impatti tiegħu.