Ir-rapport tal-2020 dwar l-Ekonomija Blu tal-UE

Fit-tielet edizzjoni tiegħu, ir-Rapport dwar l-Ekonomija Blu tal-UE jkompli janalizza l-ambitu u d-daqs tal-Ekonomija Blu fl-Unjoni Ewropea. Għandu l-għan li jipprovdi appoġġ lil dawk li jfasslu l-politika u lill-partijiet ikkonċernati fit-tfittxija għal żvilupp sostenibbli tal-oċeani, tar-riżorsi kostali u, b’mod partikolari, għall-iżvilupp u l-implimentazzjoni ta’ politiki u inizjattivi skont il-Patt Ekoloġiku Ewropew f’konformità mal-approċċ il-ġdid għal Ekonomija Blu sostenibbli.

Għall-finijiet tar-Rapport, l-Ekonomija Blu tinkludi dawk l-attivitajiet kollha li huma bbażati fuq il-baħar jew relatati mal-baħar. Għalhekk, ir-Rapport jeżamina mhux biss setturi stabbiliti (jiġifieri dawk li tradizzjonalment jikkontribwixxu għall-Ekonomija Blu) iżda wkoll setturi emerġenti (dawk li għalihom għadha qed tiżviluppa data affidabbli) u innovattivi, li jġibu opportunitajiet ġodda għall-investiment u għandhom potenzjal enormi għall-iżvilupp futur tal-komunitajiet kostali.

Dan ir-Rapport għandu l-għan li jservi bħala kontribut utli għall-valutazzjoni tal-potenzjal tal-oċeani u l-kosti għall-bidla lejn ekonomija aktar sostenibbli u għall-appoġġ tal-iżvilupp ta’ politiki f’konformità mal-approċċ strateġiku għal ekonomija blu sostenibbli fil-livelli kollha ta’ governanza.

F’din it-tielet edizzjoni, ir-Rapport ifittex li jinkludi elementi ġodda, li għandhom impatt fuq l-Ekonomija Blu. Dan jinkludi b’mod speċifiku sfidi bħat-tibdil fil-klima, u faċilitaturi bħall-Ippjanar tal-Ispazju Marittimu. B’mod partikolari, il-Kapitolu 3 jesplora l-impatti tal-attivitajiet tal-baħar f’termini ta’ emissjonijiet ta’ gassijiet serra u r-rwol tal-oċean fir-regolamentazzjoni tal-klima tad-dinja u fil-mitigazzjoni tat-tibdil fil-klima. Il-kapitolu jkompli billi jinvestiga l-impatti tat-tibdil fil-klima fuq l-oċean, bħall-effett tiegħu fuq is-settur tas-sajd u tal-akkwakultura u ż-żieda fl-għargħar li se jeħtieġu protezzjoni u adattament kostali. Fl-aħħar nett, jiġi analizzat ukoll l-impatt tat-tniġġis u tal-iskart fl-oċeani (inkluż il-plastik).