L-adattament għat-tibdil fil-klima fis-settur agrikolu fl-Ewropa

It-tibdil fil-klima diġà qed jinfluwenza r-rendimenti tal-għelejjel u l-produttività tal-bhejjem fl-Ewropa, kif ukoll id-disponibbiltà tal-ilma meħtieġ għall-irrigazzjoni, il-prattiki tat-tisqija tal-bhejjem, l-ipproċessar tal-prodotti agrikoli, u l-kundizzjonijiet tat-trasport u tal-ħżin.
Ir-Rapport tal-EEA "Climate change adaptation in the agriculture sector in Europe" (L-adattament għat-tibdil fil-klima fis-settur agrikolu fl-Ewropa) jipprovdi valutazzjoni dettaljata tal-aħħar għarfien xjentifiku dwar il-problemi ewlenin relatati mal-klima li l-agrikoltura qed tiffaċċja fl-UE u jesplora l-impatti mistennija għad-deċennji li ġejjin. Skont ir-rapport, it-tibdil fil-klima huwa previst li jnaqqas il-produttività tal-għelejjel speċjalment fin-Nofsinhar tal-Ewropa u li jtejjeb il-kundizzjonijiet għat-tkabbir tal-għelejjel fit-Tramuntana tal-Ewropa, għalkemm l-impatt negattiv ta’ avvenimenti estremi fuq l-agrikoltura huwa mistenni li jiżdied. Ir-rapport jiddiskuti l-effetti tat-tibdil fil-klima fuq ix-xejriet kummerċjali, il-valuri tal-art agrikola, l-introjtu agrikolu u l-prezzijiet tal-ikel. Barra minn hekk, jagħti ħarsa ġenerali lejn kif il-politiki u l-programmi tal-UE jindirizzaw l-adattament għat-tibdil fil-klima u jinkludi eżempji ta’ azzjonijiet ta’ adattament fattibbli u ta’ suċċess. Ir-rapport tal-EEA jenfasizza li huma meħtieġa aktar għarfien, innovazzjoni u sensibilizzazzjoni biex jittejjeb l-użu effettiv tal-miżuri ta’ adattament diġà disponibbli u jissuġġerixxi li l-Istati Membri tal-UE għandhom jagħtu prijorità aħjar lill-adattament fis-settur agrikolu, pereżempju billi jżidu l-finanzjament ta’ miżuri ta’ adattament permezz tal-implimentazzjoni tal-PAK.