Adattament għat-tibdil fil-klima ta’ proġetti kbar ta’ infrastruttura

Dan l-istudju rrieżamina d-disponibbiltà ta’ materjali tar-riżorsi li jistgħu jappoġġaw lill-iżviluppaturi tal-proġetti ta’ infrastruttura biex jikkunsidraw l-adattament għat-tibdil fil-klima. Jipprovdi rendikont ġenerali tar-riżorsi disponibbli li jikkontribwixxu għat-tħejjija tal-Istati Membri fir-rigward tar-rekwiżiti tat-tibdil fil-klima tal-perjodu ta’ programmazzjoni tal-Fondi Strutturali u ta’ Investiment Ewropej 2014-2020. Fl-aħħar nett, jidentifika xi prattiki tajbin fl-adattament għat-tibdil fil-klima.

L-informazzjoni għall-komponent ta’ rendikont tal-istudju nġabret permezz ta’ riċerka bbażata fuq l-internet, kif ukoll kwestjonarji u intervisti mmirati lejn l-awtoritajiet nazzjonali kompetenti rilevanti (awtoritajiet maniġerjali, istituti tar-riċerka, uffiċjali tal-ministeri, eċċ.). Sar rendikont kemm fil-livell Ewropew kif ukoll f’dak tal-Istati Membri. L-istudju jiddistingwi seba’ kategoriji ta’ riżorsi:

• Disponibbiltà tad-data; id-disponibbiltà, l-aċċessibbiltà u l-applikabbiltà tad-data dwar il-projezzjonijiet u l-impatti klimatiċi, il-parametri ġeofiżiċi, ix-xenarji fit-tul, l-impatti ekonomiċi, ambjentali u soċjali, eċċ.
• Metodoloġiji; metodoloġiji kwantitattivi jew kwalitattivi (sistema ta’ proċessi, sett ta’ prinċipji u regoli) għall-integrazzjoni tal-adattament għat-tibdil fil-klima fl-iżvilupp ta’ proġetti infrastrutturali.
• Għodod għall-ippjanar, l-evalwazzjoni, l-istima tal-impatt (jiġifieri software, mapep, simulazzjonijiet bil-kompjuter, viżwalizzazzjonijiet tat-tbassir tal-klima fit-tul eċċ.) biex jassistu l-adattament tal-infrastruttura għall-impatti klimatiċi.
• Gwida dwar kif jintużaw il-metodoloġiji (jiġifieri għat-twettiq ta’ valutazzjonijiet tal-vulnerabbiltà u tar-riskju tat-tibdil fil-klima) jew tiġi żviluppata d-dokumentazzjoni meħtieġa tal-proġett ta’ infrastruttura relatata mal-adattament għat-tibdil fil-klima.
• Standards tad-disinn; id-disponibbiltà ta’ standards ippubblikati tad-disinn tal-inġinerija (jiġifieri minn BSI, DIN, ISO) għal proġetti ta’ infrastruttura li jinkludu taqsimiet jew dispożizzjonijiet xierqa biex tiġi żgurata r-reżiljenza għall-impatti tat-tibdil fil-klima.
• Is-sistema u l-qafas legali; il-qafas istituzzjonali u legali adottat mill-awtoritajiet formali madwar l-UE li jintuża biex jitwasslu r-responsabbiltajiet għall-adattament għat-tibdil fil-klima, l-infrastruttura u l-ġestjoni tal-Fondi Strutturali u ta’ Investiment Ewropej.
• Kapaċità istituzzjonali; il-kapaċità umana u teknika tal-istituzzjonijiet li jwettqu l-funzjonijiet tagħhom relatati mal-adattament għat-tibdil fil-klima.

Dan l-istudju rreveda t-tħejjija f’termini ta’ disponibbiltà ta’ riżorsi speċifiċi għas-settur għal sitt setturi differenti tal-ekonomija (riċevituri): it-trasport, il-broadband, l-iżvilupp urban, l-enerġija, l-ilma u l-iskart.

L-istudju ġabar ukoll studji ta’ każijiet ta’ prattika tajba li jipprovdu eżempji tal-integrazzjoni tal-adattament u r-reżiljenza għat-tibdil fil-klima fi proġetti ta’ infrastruttura. L-istudji tal-każijiet jirriflettu varjetà ta’ Stati Membri, postijiet ġeografiċi u setturi u huma ppreżentati b’mod standardizzat biex jippermettu tixrid faċli tal-messaġġi ewlenin.