Il-prattika tal-adattament għat-tibdil fil-klima madwar l-UE

L-adattament huwa impenn ta’ sfida li għadu kif beda madwar l-UE. Din il-pubblikazzjoni għandha l-għan li tipprovdi lil dawk li jfasslu l-politika, lill-iżviluppaturi tal-proġetti u lil atturi oħra b’eżempji illustrattivi ta’ attivitajiet ta’ adattament fil-livelli nazzjonali, reġjonali u lokali. L-eżempji u l-istudji tal-każijiet ippreżentati hawnhekk jirriżultaw mir-riċerka dwar l-adattament għat-tibdil fil-klima fil-livell reġjonali fl-Istati Membri kollha tal-UE. Ir-riżultati tar-riċerka jinsabu fl-Istudju tal-Attivitajiet ta’ Adattament fil-Livell Reġjonali fl-UE, imħejji għad-DĠ Azzjoni Klimatika tal-Kummissjoni Ewropea fl-2013. Bħala parti minn din ir-riċerka, ġiet identifikata lista twila ta’ eżempji ta’ prattika, minn madwar l-UE. Dawn l-eżempji jkopru firxa ta’ prattiki ta’ adattament: sforzi biex jiġu mifhuma aħjar l-impatti tat-tibdil fil-klima; l-ippjanar għall-adattament fil-livelli kollha; u l-implimentazzjoni ta’ soluzzjonijiet konkreti ta’ adattament. Dawn l-eżempji u oħrajn meħuda mil-letteratura u l-bażi tad-data dejjem tikber ta’ każijiet fuq il-Pjattaforma Ewropea dwar l-Adattament għat-Tibdil fil-Klima (Climate-ADAPT) intużaw biex juru x’qed isir dwar it-tibdil fil-klima f’setturi ta’ politika ewlenin; intgħażlu għaxar eżempji bħala s-suġġett tal-istudji tal-każijiet itwal.

Din il-pubblikazzjoni hija ppreżentata f’żewġ partijiet. L-ewwel parti fiha ħarsa ġenerali qasira lejn l-impatti tat-tibdil fil-klima fuq setturi ta’ politika ewlenin: L-agrikoltura u l-forestrija; Il-bijodiversità; Żoni kostali; It-tnaqqis tar-riskju ta’ diżastri; Is-saħħa; L-infrastruttura u l-ġestjoni tal-ilma. L-impatti jintwerew skont is-settur biex jipprovdu fehim aħjar ta’ xi jfisser it-tibdil fil-klima għall-għajxien tagħna, kif ukoll għat-tfassil tal-politika. Ir-reazzjonijiet possibbli ta’ adattament għall-impatti ewlenin huma ppreżentati billi tintwera l-prattika tajba eżistenti.

It-tieni parti fiha għaxar studji ta’ każijiet li juru kif l-adattament għat-tibdil fil-klima huwa riċerkat, ippjanat u mwassal madwar l-UE. L-għaxar studji tal-każijiet huma pjuttost differenti fil-kontenut. Dawn jindirizzaw livelli differenti ta’ governanza – mill-kwistjonijiet nazzjonali sal-kwistjonijiet lokali kif ukoll transkonfinali kemm fl-Istati Membri kif ukoll bejniethom. Dawn ikopru firxa ta’ żoni ġeografiċi u klimatiċi fl-UE. Dawn jindirizzaw setturi vulnerabbli differenti, bħall-agrikoltura, il-ġestjoni tal-ilma, it-turiżmu, u ż-żoni kostali.