Il-konnessjoni bejn il-bijodiversità u l-mitigazzjoni u l-adattament għat-tibdil fil-klima: Rapport tat-Tieni Grupp ta' Esperti Tekniċi Ad Hoc dwar il-Bijodiversità u t-Tibdil fil-Klima

Il-bijodiversità għandha rwol importanti ħafna fil-mitigazzjoni u l-adattament għat-tibdil fil-klima. Il-ġestjoni tajba tal-ekosistemi bħall-artijiet mistagħdra u l-foresti, tibqa’ għażla effettiva ta’ mitigazzjoni minħabba l-potenzjal għoli ta’ sekwestru tas-sistemi naturali. Il-permanenza tal-bjar tal-karbonju hija marbuta wkoll maż-żamma jew mat-titjib tar-reżiljenza tal-ekosistemi.

Peress li t-tibdil fil-klima jhedded l-ambjent, is-servizzi tal-ekosistema – bħall-ikel u l-kenn, il-protezzjoni tal-komunitajiet min-nixfa u l-għargħar, il-bażi tal-għarfien u l-innovazzjonijiet tradizzjonali – se jsiru saħansitra aktar importanti u apprezzati. Dan ir-rapport jipprovdi tmien messaġġi ewlenin minn esperti magħrufa mad-dinja kollha fl-oqsma tal-bijodiversità u t-tibdil fil-klima biex jgħinuna nifhmu aħjar kif jinteraġixxu l-bijodiversità u t-tibdil fil-klima u kif nistgħu naħdmu flimkien bl-aħjar mod biex niksbu l-għanijiet komuni tagħna.

Taqsima speċifika hija ddedikata għar-relazzjonijiet bejn l-Adattament għat-Tibdil fil-Klima u l-Bijodiversità, li tenfasizza tliet aspetti ewlenin: l-ewwel nett il-ħtieġa li jiġu adottati strateġiji u prattiki ta’ adattament biex tinżamm il-bijodiversità nnifisha fid-dawl tat-tibdil fil-klima; it-tieni, l-impatti potenzjali ta’ attivitajiet usa’ ta’ adattament fuq il-bijodiversità, u, it-tielet, l-użu tal-bijodiversità u s-servizzi tal-ekosistema bħala parti minn strateġija ġenerali ta’ adattament biex tgħin lin-nies jadattaw għall-impatti negattivi tat-tibdil fil-klima.

Ir-rapport jivvaluta wkoll il-vantaġġi u l-iżvantaġġi tal-mekkaniżmi għat-tnaqqis tal-impatti tat-tibdil fil-klima fuq il-bijodiversità, inkluż l-adattament ibbażat fuq l-ekosistema, it-tnaqqis tal-emissjonijiet mid-deforestazzjoni u d-degradazzjoni tal-foresti (REDD) u attivitajiet oħra ta’ ġestjoni tal-użu tal-art. L-impatti tal-enerġija alternattiva, tal-ġeoinġinerija u ta’ attivitajiet oħra ta’ adattament fuq il-bijodiversità huma kkunsidrati wkoll.