Konklużjonijiet tal-Kunsill dwar l-Istrateġija ta' Adattament tal-UE

Fit-18 ta' Ġunju 2013, il-Kunsill (Ambjent) adotta konklużjonijiet dwar strateġija tal-UE dwar l-adattament għat-tibdil fil-klima. Huma jenfasizzaw il-ħtieġa għal aktar azzjoni fil-livelli kollha u mill-atturi rilevanti kollha sabiex jiġi indirizzat l-adattament għat-tibdil fil-klima bl-aktar mod effettiv u l-importanza tal-integrazzjoni tal-adattament fil-politiki rilevanti kollha fil-livelli kollha tal-gvern (Ewropew, nazzjonali, reġjonali u lokali), filwaqt li jitqies il-prinċipju tas-sussidjarjetà. Il-konklużjonijiet jappellaw lill-Kummissjoni biex tkompli tqis l-adattament għat-tibdil fil-klima fi proposti rilevanti għal azzjoni tal-UE u biex tiffaċilita aktar il-protezzjoni kontra t-tibdil fil-klima kif ukoll l-investimenti fit-tul, f'konformità mal-aħjar għarfien u prattika disponibbli. Huma jappellaw lill-Istati Membri kollha biex ikomplu jiżviluppaw, jimplimentaw u jirrieżaminaw il-politiki ta’ adattament tagħhom fid-dawl tal-linji gwida mħejjija mill-Kummissjoni Ewropea, li jindirizzaw kwistjonijiet bħall-aspetti transfruntiera u l-koerenza mal-pjanijiet nazzjonali għall-ġestjoni tar-riskju ta’ diżastri. Barra minn hekk, huma jissottolinjaw li aċċess imtejjeb għall-finanzjament se jkun fattur kritiku fil-bini ta’ Ewropa reżiljenti għat-tibdil fil-klima. Huma jilqgħu l-impenn mill-Kummissjoni u l-Aġenzija Ewropea għall-Ambjent biex ikomplu jiżviluppaw il-Climate-ADAPT bħala l-"punt uniku ta' servizz" għall-informazzjoni dwar l-adattament fl-Ewropa u biex jiżviluppaw l-interazzjoni bejn il-Climate-ADAPT u pjattaformi rilevanti oħra, inklużi portali ta' adattament nazzjonali u lokali.