Motivazzjoni ekonomika biex jiżdiedu d-difiżi kontra l-għargħar kostali fl-Ewropa

Il-livelli estremi tal-baħar (ESLs) fl-Ewropa jistgħu jogħlew sa metru jew aktar sal-aħħar ta’ dan is-seklu minħabba t-tibdil fil-klima. Dan joħloq sfidi sinifikanti għas-salvagwardja tal-komunitajiet kostali. Dan l-istudju jippreżenta analiżi komprensiva tax-xenarji ta’ protezzjoni ekonomikament effiċjenti tul il-kosti tal-Ewropa matul is-seklu attwali. Intuża qafas probabilistiku li jintegra simulazzjonijiet dinamiċi tal-komponenti kollha tal-ESL u t-tgħarriq tal-għargħar, l-immudellar tal-impatt u analiżi tal-ispejjeż u l-benefiċċji taż-żieda fid-digi. Ir-riżultati jindikaw li mill-inqas 83 % tal-ħsarat mill-għargħar fl-Ewropa jistgħu jiġu evitati billi d-digi jogħlew b’mod ekonomikament effiċjenti tul 23,7 %-32,1 % tal-kosta tal-Ewropa, speċifikament fejn jeżistu konurbazzjonijiet ta’ valur għoli. Il-proporzjon medju Ewropew bejn il-benefiċċji u l-kostijiet tal-investimenti jvarja minn 8.3 għal 14.9 filwaqt li fil-livell tal-pajjiż dan ivarja bejn 1.6 u 34.3, b’effiċjenzi ogħla għal xenarju b’emissjonijiet ta’ gassijiet serra ta’ livell għoli u tkabbir soċjoekonomiku b’saħħtu.

L-analiżi tar-riskju tal-għargħar kostali kienet ibbażata fuq il-mudell LISCOAST (għodda integrata fuq skala kbira għall-valutazzjoni tal-livell tal-baħar u tal-kosta) żviluppat miċ-Ċentru Konġunt tar-Riċerka tal-Kummissjoni Ewropea. Il-qafas modulari ġie żviluppat biex jivvaluta l-impatti relatati mat-temp fiż-żoni kostali fi klimi preżenti u futuri. Din tikkombina għodod u settijiet tad-data ta’ mmudellar fuq skala kbira tal-ogħla livell ta’ żvilupp tekniku biex tikkwantifika l-periklu, l-esponiment u l-vulnerabbiltà u tikkalkula r-riskji konsegwenti. Il-qafas tal-immudellar ġie estiż aktar biex jiġu evalwati l-kostijiet u l-benefiċċji taż-żieda fl-għoli tad-digi u biex jinstab l-aħjar disinn ta’ adattament ibbażat fuq il-massimizzazzjoni tal-valur preżenti nett. Il-livelli estremi tal-baħar attwali u futuri tul il-kosti tal-Ewropa huma bbażati fuq projezzjonijiet tal-ogħla livell ta’ żvilupp tekniku taż-żieda fil-livell tal-baħar, tal-mewġ, taż-żidiet fil-maltempati u tal-mareat għal emissjonijiet għoljin (RCP8.5) u għal emissjonijiet moderati (RCP4.5).