Ir-rapport tal-EEA "Climate change impacts on health in Europe: sħana u mard infettiv”

Mewġiet ta’ sħana mingħajr preċedent — kif deher aktar kmieni din is-sena madwar l-Ewropa — huma l-akbar theddida diretta għas-saħħa relatata mal-klima għall-popolazzjoni tal-Ewropa.  Il-mewġiet tas-sħana diġà huma responsabbli għal bosta mwiet u mard. Dan il-piż huwa mistenni li jiżdied mingħajr aktar miżuri ta’ adattament għat-tibdil fil-klima u ta’ mitigazzjoni tiegħu. Il-pjanijiet ta’ azzjoni dwar is-saħħa tas-sħana, l-ekoloġizzazzjoni urbana, id-disinn aħjar tal-bini u l-aġġustament tal-ħinijiet tax-xogħol jistgħu jikkontribwixxu għal protezzjoni aħjar tal-aktar gruppi vulnerabbli fis-soċjetà.

Il-mard infettiv sensittiv għall-klima — theddida emerġenti oħra — huwa mbassar li jkompli jinfirex lejn it-Tramuntana u jikkawża piż akbar ta’ mard fl-Ewropa. 

Filwaqt li l-ħtieġa li jiġu indirizzati l-impatti tat-tibdil fil-klima fuq is-saħħa tal-bniedem qed tiġi rikonoxxuta dejjem aktar, issa wasal iż-żmien li nimxu mill-ippjanar għall-azzjoni u li ntejbu s-sensibilizzazzjoni fost il-prattikanti tas-saħħa pubblika u tal-kura tas-saħħa biex il-popolazzjoni tal-Ewropa ssir aktar reżiljenti, u b’mod partikolari dawk il-persuni li huma aktar vulnerabbli minħabba l-istatus soċjoekonomiku jew l-età.