Mekkaniżmu tal-UE għall-Protezzjoni Ċivili – Deċiżjoni Nru 1313/2013/UE

Il-Mekkaniżmu tal-Unjoni għall-Protezzjoni Ċivili (il-Mekkaniżmu) ifittex li jsaħħaħ il-kooperazzjoni bejn l-UE u l-pajjiżi tal-UE, u li jiffaċilita l-koordinazzjoni bejniethom, fil-qasam tal-protezzjoni ċivili.
Tintroduċi approċċ ta’ kwalità ogħla, aktar integrat u kosteffiċjenti għall-ġestjoni tad-diżastri tal-UE.

L-objettiv ewlieni tal-mekkaniżmu huwa li jtejjeb l-effettività tas-sistemi għall-prevenzjoni, it-tħejjija u r-rispons għal diżastri naturali u dawk ikkawżati mill-bniedem ta' kull tip fl-UE u barra minnha. Għalkemm l-enfasi tagħha hija fuq il-protezzjoni tan-nies, hija tkopri wkoll l-ambjent u l-proprjetà, inkluż il-wirt naturali.

L-objettivi speċifiċi tal-mekkaniżmu huma li:
il-kisba ta' livell għoli ta' protezzjoni kontra d-diżastri permezz
tal-prevenzjoni jew it-tnaqqis tal-effetti potenzjali tagħhom;
- it-trawwim ta’ kultura ta’ prevenzjoni u
- it-titjib tal-kooperazzjoni bejn il-protezzjoni ċivili u servizzi rilevanti oħra;
- ittejjeb it-tħejjija kemm fil-livell tal-pajjiż tal-UE kif ukoll f’dak tal-UE biex tirrispondi għad-diżastri;
- tiffaċilita rispons rapidu u effiċjenti fil-każ ta’ diżastri jew diżastri imminenti (kważi ċerti li jseħħu);
- iż-żieda fis-sensibilizzazzjoni u t-tħejjija tal-pubbliku għad-diżastri.

Il-prevenzjoni tad-diżastri hija fokus ewlieni tal-Mekkaniżmu b'enfasi partikolari fuq il-valutazzjoni tar-riskju u l-ippjanar tal-ġestjoni tar-riskju.

Biex itejjeb it-tħejjija u r-rispons għad-diżastri fil-livell tal-UE, il-Mekkaniżmu jistabbilixxi Ċentru ta’ Koordinazzjoni tar-Reazzjoni f’każ ta’ Emerġenza (ERCC) operazzjonali 24/7 ġestit mill-Kummissjoni Ewropea fi Brussell. L-ERCC huwa ċentru ta’ komunikazzjoni u koordinazzjoni disponibbli għall-atturi tal-protezzjoni ċivili.

Għodod addizzjonali jinkludu:
— is-Sistema Komuni ta’ Komunikazzjoni u Informazzjoni f’każ ta’ Emerġenza (CECIS), għodda tal-IT li tippermetti komunikazzjoni immedjata f’każ ta’ emerġenza fost il-pajjiżi parteċipanti;
— eżerċizzji u programm ta’ taħriġ biex tittejjeb il-kapaċità ta’ rispons għad-diżastri tal-pajjiżi tal-UE u l-koordinazzjoni tal-assistenza tal-protezzjoni ċivili;
— moduli tal-protezzjoni ċivili: unitajiet ta' persunal u tagħmir lesti biex jiġu mobilizzati;
— il-Kapaċità Ewropea ta’ Reazzjoni għall-Emerġenzi: konsorzju volontarju ta’ kapaċitajiet ta’ rispons għad-diżastri tal-pajjiżi tal-UE impenjati minn qabel, lesti biex jiġu mobilizzati għall-operazzjonijiet tal-protezzjoni ċivili tal-UE. Dan jinkludi moduli ta’ kwalità għolja ta’ timijiet ta’ għajnuna, esperti u tagħmir, u jirċievi rati ogħla ta’ kofinanzjament mill-UE.
Il-parteċipazzjoni fil-Mekkaniżmu u d-diversi għodod elenkati hawn fuq hija miftuħa għall-pajjiżi tal-adeżjoni, il-pajjiżi kandidati u l-pajjiżi kandidati potenzjali. Il-Mekkaniżmu bħalissa għandu 33 pajjiż parteċipant (28 pajjiż tal-UE flimkien mal-Iżlanda, in-Norveġja, is-Serbja, il-Montenegro u l-Eks-Repubblika Jugoslava tal-Maċedonja).

Baġit: ftit aktar minn €368.4 miljun ġew allokati għall-implimentazzjoni tal-Mekkaniżmu tal-Unjoni għall-perjodu 2014-20.