Valutazzjoni Ewropea tar-Riskju Klimatiku

L-Ewropa hija l-kontinent li qed jisħon l-aktar malajr fid-dinja, u r-riskji klimatiċi qed jheddu s-sigurtà tal-enerġija u tal-ikel, l-ekosistemi, l-infrastruttura, ir-riżorsi tal-ilma, l-istabbiltà finanzjarja, u s-saħħa tan-nies tagħha. Skont l-ewwel Valutazzjoni Ewropea tar-Riskju Klimatiku (EUCRA), ippubblikata mill-EEA, ħafna minn dawn ir-riskji diġà laħqu livelli kritiċi u jistgħu jsiru katastrofiċi mingħajr azzjoni urġenti u deċiżiva.

Il-valutazzjoni tidentifika 36 riskju klimatiku ewlieni għall-Ewropa f’ħames raggruppamenti wesgħin: l-ekosistemi, l-ikel, is-saħħa, l-infrastruttura, u l-ekonomija u l-finanzi. Aktar minn nofs ir-riskji klimatiċi ewlenin identifikati fir-rapport jitolbu aktar azzjoni issa u tmienja minnhom huma partikolarment urġenti, prinċipalment biex jiġu kkonservati l-ekosistemi, jiġu protetti n-nies mis-sħana, jiġu protetti n-nies u l-infrastruttura mill-għargħar u n-nirien fil-foresti, u biex tiġi żgurata l-vijabbiltà tal-mekkaniżmi ta’ solidarjetà Ewropej, bħall-Fond ta’ Solidarjetà tal-UE.

Skont il-valutazzjoni, il-politiki u l-azzjonijiet ta’ adattament tal-Ewropa mhumiex qed iżommu l-pass mar-riskji li qed jikbru b’rata mgħaġġla. F’ħafna każijiet, l-adattament inkrementali mhux se jkun biżżejjed u, peress li ħafna miżuri biex tittejjeb ir-reżiljenza għall-klima jeħtieġu żmien twil, tista’ tkun meħtieġa azzjoni urġenti anke fuq riskji li għadhom mhumiex kritiċi.