Atlas Ewropew tar-Riskju ta’ Nixfa

F’dawn l-aħħar snin, in-nixfiet kellhom impatti sostanzjali fuq kważi r-reġjuni kollha tal-UE, u affettwaw diversi sistemi kritiċi bħall-agrikoltura, il-provvista tal-ilma, l-enerġija, it-trasport fuq ix-xmajjar, u l-ekosistemi. Dawn l-impatti huma mistennija li jkomplu jiżdiedu minħabba t-tibdil fil-klima. Filwaqt li xi wħud mill-ixprunaturi tar-riskju tan-nixfa huma magħrufa sew għal xi sistemi u reġjuni, ir-riskji u l-impatti tan-nixfa għadhom diffiċli biex jiġu vvalutati u kkwantifikati.

L-Atlas Ewropew tar-Riskju ta’ Nixfa huwa pass lejn valutazzjoni tan-nixfiet ibbażata fuq l-impatt u jista’ jappoġġa l-iżvilupp u l-implimentazzjoni ta’ politiki u azzjonijiet ta’ ġestjoni u adattament tan-nixfiet. Dan jikkaratterizza kif il-periklu, l-esponiment u l-vulnerabbiltà għan-nixfa jinteraġixxu u jaffettwaw sistemi differenti iżda interkonnessi: l-agrikoltura, il-provvista pubblika tal-ilma, l-enerġija, it-trasport fuq ix-xmajjar, l-ekosistemi tal-ilma ħelu u terrestri.

L-Atlas jippreżenta kemm approċċ kunċettwali kif ukoll kwantitattiv għar-riskju ta’ nixfa għal dawn is-sistemi. Il-mudelli kunċettwali tar-riskju ta’ nixfa (ktajjen tal-impatt) huma r-riżultat ta’ rieżami tal-letteratura fl-Ewropa u konsultazzjonijiet ma’ esperti biex jinbnew viżwalizzazzjonijiet tal-aktar xprunaturi rilevanti u kif dawn jinteraġixxu biex jiġu ddeterminati r-riskju u l-impatti. L-istima kwantitattiva tar-riskju ta’ nixfa hija bbażata fuq tekniki ta’ tagħlim awtomatiku u timmappja r-riskju ta’ nixfa fil-livell sottonazzjonali f’termini ta’ telf medju annwali u telf massimu probabbli f’perjodi ta’ ritorn speċifiċi, kemm għall-kundizzjonijiet klimatiċi attwali, kif ukoll għal projezzjonijiet taħt livelli differenti ta’ tisħin globali (+1,5 °C, +2 °C, +3 °C).