Pjanuri tal-għargħar: sistema naturali għall-preservazzjoni u r-restawr

L-għargħar huwa wieħed mill-aktar diżastri naturali għaljin u, f’partijiet tal-Ewropa, it-tibdil fil-klima huwa antiċipat li jżid ir-riskju ta’ għargħar. Il-pjanuri tal-għargħar ikopru 7 % taż-żona kontinentali Ewropea u sa 30 % taż-żona tas-sit terrestri tagħha ta’ Natura 2000; madankollu, l-istudji wrew li 70-90 % tal-pjanuri tal-għargħar ġew degradati ambjentalment. Għalhekk, l-iżvilupp ta’ strateġiji għall-ġestjoni tar-riskji ta’ għargħar huwa sfida importanti. 

Dan ir-rapport jipprovdi ħarsa ġenerali lejn l-aspetti differenti tal-ġestjoni tal-pjanuri mfawra. B’mod aktar speċifiku, ir-rapport juri kif il-pjanuri tal-għargħar naturali u restawrati jipprovdu alternattiva għall-miżuri strutturali biex jiġi indirizzat ir-riskju akbar ta’ għargħar minħabba t-tibdil fil-klima. Fl-istess ħin, ir-restawr tal-pjanuri tal-għargħar jappoġġa l-kisba ta’ servizzi tal-ekosistema ta’ kwalità ogħla bħal kwalità mtejba tal-ilma, kundizzjonijiet imtejba għall-konservazzjoni tal-bijodiversità u valur rikreattiv imtejjeb. Barra minn hekk, tikkontribwixxi għall-kisba ta’ diversi objettivi ta’ politika tal-UE, b’mod partikolari fil-kuntest tad-Direttivi Qafas dwar l-Ilma, dwar l-Għargħar, dwar il-Ħabitats u dwar l-Għasafar. 

Fl-ewwel kapitolu hemm deskritt il-qafas ta’ politika globali u Ewropew li jkopri l-pjanuri tal-għargħar. Fil-Kapitolu 2, huma pprovduti l-karatteristiċi bażiċi tas-sistema tal-pjanuri tal-għargħar u tingħata deskrizzjoni ta’ kif l-użu tal-art u l-popolazzjonijiet fil-pjanuri tal-għargħar huma distribwiti fost it-33 pajjiż membru tal-EEA u sitt pajjiżi li jikkooperaw. Fil-Kapitolu 3, xi wħud mis-servizzi ewlenin tal-ekosistema pprovduti mill-pjanuri tal-għargħar huma deskritti, flimkien ma’ approċċi għar-restawr tax-xmajjar u tal-pjanuri tal-għargħar u eżempji ta’ proġetti ta’ restawr li rnexxew. Fil-Kapitolu 4, jiġu diskussi l-kondizzjonijiet għal implimentazzjoni b'suċċess.