- From Science to Policy (Il-mitigazzjoni u l-adattament għat-tibdil fil-klima bbażati fuq il-foresti fl-Ewropa)

Il-foresti u l-prodotti tal-injam huma parti mis-settur tal-Użu tal-Art, it-Tibdil fl-Użu tal-Art u l-Forestrija (LULUCF), li fl-UE jneħħi madwar 10 % tal-emissjonijiet totali ta’ gassijiet serra tal-Unjoni Ewropea, attwalment 256 MtCO2eq/sena. Skont il-miri ta’ politika proposti mill-Kummissjoni Ewropea, is-settur jeħtieġ li jneħħi wkoll madwar 50 MtCO2eq/sena sal-2030 u 170 MtCO2eq/sena sal-2050. Abbażi ta’ rieżami tal-letteratura xjentifika, l-istudju l-ġdid From Science to Policy juri li l-potenzjal ta’ mitigazzjoni addizzjonali kkombinat mid-deforestazzjoni evitata, l-afforestazzjoni/ir-riforestazzjoni, il-bidliet fl-użu tal-injam, u l-kaskata huwa sa 72 MtCO2eq/sena sal-2050 fl-UE. Dan jista’ jiżdied għal 125 MtCO2eq/sena meta kkombinat ma’ attivitajiet ta’ konservazzjoni tal-foresti, 138 MtCO2eq/sena meta kkombinat ma’ ġestjoni attiva oħra tal-foresti, jew 143 MtCO2eq/sena meta kkombinat ma’ tnaqqis fil-ħsad tal-foresti.

Madankollu, il-kapaċità tal-foresti li jneħħu s-CO2 hija affettwata mit-tibdil fil-klima minħabba li tista’ żżid u tnaqqas il-ħżin tal-karbonju fil-foresti u fil-prodotti tal-injam. Barra minn hekk, bħalissa hemm disponibbli informazzjoni limitata dwar il-kostijiet relatati u l-fattibbiltà tat-twettiq tal-potenzjal ta’ mitigazzjoni bbażat fuq il-foresti, u japplika grad għoli ta’ inċertezza.

Dan l-istudju jesplora kif il-kontribut minn azzjonijiet ta’ mitigazzjoni bbażati fuq il-foresti jista’ jiġi massimizzat, filwaqt li jirrakkomanda li jiġi adottat approċċ olistiku. Jenħtieġ li jiġu kkombinati diversi attivitajiet ta’ mitigazzjoni bbażati fuq il-foresti biex jiġi mmassimizzat l-effett u jitrawmu sinerġiji, interazzjonijiet, kobenefiċċji u applikabbiltà reġjonali.