Tisħin Globali ta' 1.5 °C

Dan ir-rapport ġie abbozzat mill-IPCC wara l-istedina “biex fl-2018 jiġi pprovdut Rapport Speċjali dwar l-impatti tat-tisħin globali ta’ 1,5 °C ’il fuq mil-livelli preindustrijali u l-perkorsi relatati tal-emissjonijiet globali tal-gassijiet serra”li tinsab fid-Deċiżjoni tal-21^Konferenza tal-Partijiet tal-Konvenzjoni Qafas tan-Nazzjonijiet Uniti dwar it-Tibdil fil-Klima biex jiġi adottat il-Ftehim ta’ Pariġi.

Ir-rapport isib li l-limitazzjoni tat-tisħin globali għal 1.5oC tkun teħtieġ bidliet rapidi, estensivi u bla preċedent fl-aspetti kollha tas-soċjetà, eż. l-art, l-enerġija, l-industrija, il-bini, it-trasport, u l-bliet. B’benefiċċji ċari għan-nies u għall-ekosistemi naturali, il-limitazzjoni tat-tisħin globali għal 1,5 °C meta mqabbel ma’ 2 °C tista’ timxi id f’id mal-iżgurar ta’ soċjetà aktar sostenibbli u ekwa.

Ir-rapport jenfasizza għadd ta’ impatti tat-tibdil fil-klima li jistgħu jiġu evitati billi t-tisħin globali jiġi limitat għal 1,5 °C meta mqabbel ma’ 2 °C, jew aktar. Pereżempju, sal-2100, iż-żieda globali fil-livell tal-baħar tkun 10 cm inqas b’tisħin globali ta’ 1,5 °C meta mqabbla ma’ 2 °C. Il-probabbiltà ta’ Oċean Artiku ħieles mis-silġ tal-baħar fis-sajf tkun darba fis-seklu b’tisħin globali ta’ 1,5 °C, meta mqabbla ma’ mill-inqas darba kull għaxar snin b’2 °C. Is-sikek tal-qroll jonqsu b’70-90 fil-mija b’tisħin globali ta’ 1,5 °C, filwaqt li prattikament kollha (> 99 fil-mija) jintilfu b’2 °C.

Il-limitazzjoni tat-tisħin globali tagħti wkoll lin-nies u lill-ekosistemi aktar spazju biex jadattaw u jibqgħu taħt il-limiti tar-riskju rilevanti. 

Ir-Rapport Speċjali dwar it-Tisħin Globali ta' 1.5oC ġie approvat mill-IPCC fit-8 ta' Ottubru 2018 f'Incheon, ir-Repubblika tal-Korea. Dan se jkun kontribut xjentifiku ewlieni fil-Konferenza ta’ Katowice dwar it-Tibdil fil-Klima fil-Polonja f’Diċembru 2018, meta l-gvernijiet jirrevedu l-Ftehim ta’ Pariġi biex jindirizzaw it-tibdil fil-klima.