GREEN PAPER dwar l-assigurazzjoni tad-diżastri naturali u dawk ikkawżati mill-bniedem

Bħal ħafna reġjuni oħra tad-dinja, l-Unjoni Ewropea hija vulnerabbli għal kważi t-tipi kollha ta’ diżastri naturali. Id-diżastri mhux biss jikkawżaw telf uman iżda wkoll jagħmlu ħsara lill-valur ta' biljuni ta' euro kull sena, u jaffettwaw l-istabbiltà u t-tkabbir ekonomiku. Id-diżastri jista’ jkollhom effetti transfruntiera u jistgħu potenzjalment jheddu żoni sħaħ fil-pajjiżi ġirien. Anke meta l-ispejjeż ta’ diżastri kbar ikunu kkonċentrati lokalment, jekk l-ispejjeż ma jkunux koperti b’mod adegwat mill-assigurazzjoni, l-Istati Membri individwali jistgħu jġorru piżijiet fiskali kbar, li jistgħu jikkawżaw żbilanċi interni u esterni. Din hija għalhekk kwistjoni importanti għaċ-ċittadini, il-kumpaniji u l-gvernijiet madwar l-Unjoni.

Din il-Green Paper tqajjem għadd ta' mistoqsijiet dwar l-adegwatezza u d-disponibbiltà ta' assigurazzjoni xierqa kontra d-diżastri u takkumpanja l-Komunikazzjoni intitolata "Strateġija tal-UE dwar l-adattament għat-tibdil fil-klima". L-objettiv huwa li titqajjem kuxjenza u li jiġi vvalutat jekk azzjoni fil-livell tal-UE tistax tkun xierqa jew ġustifikata biex jittejjeb is-suq għall-assigurazzjoni kontra d-diżastri fl-Unjoni Ewropea. B’mod aktar ġenerali, dan il-proċess se jespandi wkoll il-bażi tal-għarfien, jgħin fil-promozzjoni tal-assigurazzjoni bħala għodda għall-ġestjoni tad-diżastri u b’hekk jikkontribwixxi għal bidla lejn kultura ġenerali ta’ prevenzjoni u mitigazzjoni tar-riskju ta’ diżastri, u jġib aktar data u informazzjoni.