Ekoloġizzazzjoni: skema aktar kumplessa ta’ appoġġ għall-introjtu, li għadha mhijiex ambjentalment effettiva

L-agrikoltura, b’mod partikolari l-biedja intensiva, għandha impatt negattiv fuq l-ambjent u l-klima. L-ekoloġizzazzjoni - pagament dirett li jippremja lill-bdiewa għal prattiki tal-biedja li huma ta’ benefiċċju għall-kwalità tal-ħamrija, is-sekwestru tal-karbonju u l-bijodiversità - ġiet introdotta fl-2015, bħala mezz biex tittejjeb il-prestazzjoni ambjentali u klimatika tal-Politika Agrikola Komuni tal-UE. L-ekoloġizzazzjoni, kif implimentata attwalment, x’aktarx li ma tilħaqx dan l-objettiv, prinċipalment minħabba l-livell baxx ta’ rekwiżiti, li fil-biċċa l-kbira jirriflettu l-prattika agrikola normali. Ir-rapport jistma li l-ekoloġizzazzjoni wasslet għal bidla fil-prattika tal-biedja fuq madwar 5 % biss tal-art agrikola kollha tal-UE. Ġew ipprovduti għadd ta’ rakkomandazzjonijiet dwar kif għandhom jitfasslu strumenti ambjentali aktar effettivi għall-Politika Agrikola Komuni wara l-2020.