Ambjent b’saħħtu, ħajjiet b’saħħithom: kif l-ambjent jinfluwenza s-saħħa u l-benesseri fl-Ewropa

In-natura tipprovdi l-bażi għas-saħħa tajba u l-benesseri tal-popolazzjoni Ewropea. L-arja nadifa, l-ilma u l-ikel huma essenzjali għas-sostenn tal-ħajja; l-ambjenti naturali jipprovdu spazju għar-rikreazzjoni, ir-rilassament u l-interazzjoni soċjali; u l-materja prima tiddaħħal fis-sistemi ta' produzzjoni tagħna biex tipprovdi l-kumditajiet tal-ħajja kontemporanja.

Fl-istess ħin, it-tniġġis ambjentali huwa inevitabbli. Aħna esposti għat-tniġġis fid-djar tagħna, fil-postijiet tax-xogħol tagħna, fl-ambjent ta’ barra u meta nieklu, nilagħbu, norqdu, insuqu, nimxu, ngħumu jew niġru. Fl-2012, 13 % tal-imwiet kollha fl-UE kienu attribwibbli għall-ambjent. Dawn l-imwiet jistgħu jiġu evitati u jistgħu jitnaqqsu b’mod sinifikanti permezz ta’ sforzi biex tittejjeb il-kwalità ambjentali. 

Il-pandemija tal-COVID-19 tipprovdi eżempju ċar tar-rabtiet inseparabbli bejn is-saħħa tal-bniedem u s-saħħa tal-ekosistema. Huwa maħsub li din il-marda ġdida tfaċċat fil-popolazzjonijiet tal-friefet il-lejl u sussegwentement qabżet speċijiet biex tinfetta lill-bnedmin f’suq tal-frott tal-baħar u tal-annimali. Il-feġġa ta’ tali patoġeni żoonotiċi hija marbuta mad-degradazzjoni ambjentali u mal-interazzjonijiet tal-bniedem mal-annimali fis-sistema tal-ikel. Fatturi oħra, bħall-esponiment għat-tniġġis tal-arja u l-istatus soċjali, jidhru li jaffettwaw ir-rati ta’ trażmissjoni u ta’ mortalità b’modi li għadhom mhumiex mifhuma bis-sħiħ.

It-tibdil fil-klima jikkontribwixxi għall-piż tal-mard u l-imwiet prematuri fl-Ewropa. L-effetti diretti fuq is-saħħa jinkludu l-mewt, il-korriment u r-riskju akbar ta’ mard li jinġarr mill-ikel u mill-ilma, li jirriżulta minn temperaturi estremi, għargħar u nirien fil-foresti. L-impatti indiretti jirriżultaw minn bidliet fid-distribuzzjoni ta’ mard u allerġeni li jinġarru minn vetturi sensittivi għall-klima, tnaqqis fil-produttività agrikola u sorsi tal-ilma kkontaminati.